Yehova yange kaa a Samuel ér: ‘Za hen ya u Yese. M tsua wan na u nomso ugen mer a va lu tor u Iserael, zum u Saulu una kpe yô.’ Tsô Samuel za hen ya u Yese. Za nengen a wan u Yese u vesen la yô, a kaa ken ishima na ér: ‘A̱ shi nan kpa a lu gumor ne.’ Kpa Yehova kaa a Samuel ér ka un la ga. Yehova kaa ér: ‘Ka m nenge er ishima i lu or ker la, ka mluashe u nan tseegh ga.’

Yese shi yange va a ônov nav mbanomso mbagenev ataratar hen Samuel. Kpa Samuel kaa ér: ‘Yehova tsua môm môm ga. U ngu a ônov mba nomso mbagenevee?’ Yese kaa ér: ‘Een, shi môm, ka wan wam u masetyô, iti na ér Davidi. Ngu kuran mo iyôngo ken toho.’ Davidi za van yô, Yehova kaa a Samuel ér: ‘Ka un je ne!’ Samuel maa haa Davidi mkurem sha ityou, tsegha un ér a va lu tor u Iserael ken hemen.

Shighe karen yô, Mbaiserael yem u za nôngon ityav vea Mbafiliti. Mbafiliti gema lu a orshoja ugen u yange kehe shi tav kpishi yô, iti na ér Goliati. Hanma iyange yô, Goliati a va tile a lahan Mbaiserael, a ôron genger genger ér: ‘Na nen or nana va nôngo ityav a mo. Aluer nan hembam yô, se hingir ikpan yene. Kpa aluer m hemba nan yô, ne di ne hingir ikpan yase.’

Yange anmgbianev mba Davidi mbagenev lu ken shoja. Nahan Davidi za hen ape ushoja mba Iserael haa afo la, u za nan anmgbianev nav mbara kwaghyan. Davidi ungwan kwagh u Goliati lu ôron la yô, a kaa ér: ‘Mo me nôngo ityav a na!’ Tor Saulu kaa a na ér: ‘Kpa we  u ngu wanye.’ Davidi gema kaa ér: ‘Yehova una wasem.’

Tsô Saulu gema riga na i huan nôngon ityav la na Davidi ér a hua, kpa Davidi kaa ér: ‘Me fatyô u huan riga ne nôngon ityav a mi ga.’ Davidi maa tôô mzu na sen shin uwagh ugen. Mzu ka kwagh u keren iwen a mi. Davidi za tôô awen a kôngor ataan shin uwagh la, wa ken ikpa na. Maa yevese za sha Goliati. Ikyôror Goliati genger imo kaa ér: ‘Ka we anwan ne, va heen. M wua u m na inyon i purugh kua annyamev mba ken toho ve ya u ka hi.’ Kpa Davidi cia ga. A ôr a or la genger genger ér: ‘U ngu van a sanker man dagi, kpa mo yô, m ngu van ken iti i Yehova. Fa wer ka se u lu nôngon ityav a vese ga, kpa ka Aôndo. Hanma or heen nana nenge er Yehova a lu a tahav i hembe sanker shin dagi yô. Una na ne cii sha ikyev yase.’

Tsô Davidi wa iwen i môm ken mzu na, maa zungur sha agee a na cii. Yehova wase, iwen la due sha agee za ta Goliati sha icur, nyôr tema ken atô. Ikyôror la maa gba, kpe her je. Mbafiliti maa coon ayem gba yevese ér vea war. U na Yehova jighjigh er Davidi nahan kpa?