Jehova wakabuzya Samiyele kuti: ‘Yinka kung’anda yaJese. Umwi wabana bakwe uyooba mwaami wachisi chaIsrayeli.’ Samiyele wakiinka kung’anda yaJese. Naakabona mwana waJese mupati wakati: ‘Nchobeni ooyu nguwe ngwasalide Jehova.’ Pesi Jehova wakamubuzya kuti teenguwe pe ngwaakasalide. Jehova wakabuzya Samiyele kuti: ‘Ndilanga mbabede muntu mumoyo kutali chiwa chakwe.’

Jese wakeeta bana bakwe bali musanu awumwi kuli Samiyele. Samiyele wakati: ‘Taakwe naba omwe ngwaasala Jehova akati kabaaba. Bana bako mpubali na boonse awa?’ Jese wakati: ‘Kwasyaala umwi muniini Davida, ulikweembela mbelele.’ Mpawo Davida naakasika, Jehova wakabuzya Samiyele kuti: ‘Ngonguwe oyu!’ Samiyele wakananika Davida kuti azoobe mwaami wachisi chamaIsrayeli kwiinda mukumutila mafuta amutwe.

Nikwakaba chiindi, maIsrayeli bakali kuyanda kulwana amaFilisti, mpawo kwakali silumamba muFilisti wakali amanguzu wakali kutegwa Goliyati. Buzuba abuzuba, Goliyati wakali kusampawula maIsrayeli. Wakali kwaamba kuti: ‘Amusale muntu aze kuzoolwana andime. Ikuti wandizunda tulaba bazike banu, pesi kuti ndamuzunda mulaba bazike besu.’

Davida wakeetela bakulana bakwe bakali basilumamba chakulya. Naakamvwa Goliyati kali kusampawula, Davida wakati: ‘Ndiyanda kuyoolwana amuFilisti oyu.’ Pesi Mwaami Sawulu wakati: ‘Uchili mwanike-nike.’ Mpawo Davida wakati: ‘Jehova uzoondivuna.’

 Sawulu wakasamika Davida zyakusama zyakwe zyankondo, pesi Davida wakati: ‘Nsikonzyi kweenda azeezi.’ Mpawo Davida wakabweza ngwiima yakwe akuya kukalonga. Wakasala mabwe aali musanu aabulungene akwaabikka mukakwama kakwe. Mpawo wakachijaana kaya kuli Goliyati. Bbabbani eelyo lyakoompolola kaliti: ‘Boola mulombe. Mubili wako njoowupa bayuni bakujulu abanyama bamusokwe.’ Davida taakayoowa pe. Pesi, wakavwiila kati: ‘Webo uza kulindime apanga asumu, pesi mebo ndiza kulinduwe muzina lyaJehova. Toli kulwana andiswe pe, pesi ulikulwana aLeza. Bantu boonse bayooziba kuti Jehova ulaamanguzu kwiinda panga asumu. Ulamwaaba mumaanza eesu.’

Davida wakabikka bbwe mungwiima yakwe akuliwaala amanguzu aakwe oonse. Kwiinda mukugwasigwa aJehova, bbwe eelyo lyakawuma Goliyati akubbila munkumu yakwe. Bbabbani eelyo lyakawida ansi akufwa. MaFilisti bakachija. Ulamusyoma na Jehova mbuli kwakachita Davida?