Yehovha u byele Samuwele a ku: ‘Yana ekaya ka Yese. Un’wana wa vana vakwe ndzi ta n’wi endla hosi ya Israyele.’ Kutani Samuwele u ye ekaya ka Yese. Loko a vona n’wana wa Yese lonkulu u te: ‘Jaha leri ku fanele ku ri rona.’ Kambe Yehovha u byele Samuwele leswaku a hi rona. Yehovha te: ‘Ndzi vona leswi nga le mbilwini ya munhu, ku nga ri leswi a langutekisaka xiswona ntsena.’

Yese u tlhele a vitana vana vakwe lavan’wana va tsevu va ta eka Samuwele. Kambe Samuwele u te: ‘Yehovha a nga hlawulanga ni un’we wa vona. Xana va helele kwala?’ Yese u te: ‘Ku ni lontsongo, ku nga Davhida. U ye eku riseni ka tinyimpfu ta mina.’ Loko Davhida a fika, Yehovha u byele Samuwele a ku: ‘Loyi hi yena!’ Kutani Samuwele u tote Davhida mafurha enhlokweni, a n’wi endla hosi leyi landzelaka ya Israyele.

Siku rin’wana Vaisrayele a va ri eku lweni ni Vafilista, lava a va ri ni nhenha ya xihontlovila leyi vuriwaka Goliyadi. Siku ni siku Goliyadi a a tlhontlha Vaisrayele. A a huwelela a ku: ‘Tisani wanuna leswaku hi ta lwa. Loko a ndzi dlaya hi ta va mahlonga ya n’wina. Kambe loko ndzi n’wi dlaya, mi ta va mahlonga ya hina.’

Siku rin’wana Davhida u ye laha masocha ya Vaisrayele a ma hlengeletane kona, a yisela vabuti wakwe lava a va ri masocha swakudya. U twe leswi Goliyadi a swi vula, kutani a ku: ‘Ndzi ta lwa na yena!’ Hosi Sawulo u te: ‘Kambe wena wa ha ri mufana.’ Davhida u te: ‘Yehovha u ta ndzi pfuna.’

Sawulo u ringete ku ambexa Davhida swiambalo swakwe swa nyimpi, kambe Davhida  u te: ‘A ndzi swi koti ku lwa ndzi ambale swiambalo leswi.’ Davhida u teke xipelupelu xakwe kutani a ya exinkobyanini. U rhwalele maribye ya ntlhanu ya kahle kutani a ma chela enkwameni. Davhida u landze Goliyadi. Xihontlovila xexo xi huwelele xi ku: ‘Tana laha mufana ndziwena. Ndzi ta ku nyiketa eka swinyenyana swa matilo ni swivandzana swa nhova.’ Davhida a a nga chavi. U huwelele a ku: ‘U ta eka mina hi banga ni fumu ni tlhari, kambe mina ndzi ta eka wena hi vito ra Yehovha. A wu lwi na hina; kambe u lwa ni Xikwembu. Hinkwavo vanhu lava nga laha va ta swi vona leswaku Yehovha u ni matimba ngopfu ku tlula tlhari kumbe banga. U ta mi nyiketa eka hina.’

Davhida u hoxe ribye eka xipelupelu xakwe a xi rhendzelekisa hi matimba swinene a xi kongomisa eka Goliyadi. Yehovha u endle leswaku ribye ri ba mombo wa Goliyadi. Kutani xihontlovila xi wele ehansi xi fa. Endzhaku ka sweswo, Vafilista va balekile. Xana wa n’wi tshemba Yehovha hilaha Davhida a n’wi tshembeke hakona?