Иегова Самуилге мынча дээн: «Иессей деп кижиже бар. Ооң оолдарының бирээзи келир үеде Израильдиң хааны болур». Самуил Иессейге чеде берген. Ооң улуг оглун көрүп кааш, Самуил боданган: «Хаанывыс бо боор хевирлиг». Ынчалза-даа Иегова: «Хаан ол эвес-тир» — дээш, «Мен кижилерниң чүгле даштыкы хевирин эвес, а чүрээн көөр мен» — дээн.

Иессей Самуилге алды оглун эккелген. Ынчалза-даа Самуил: «Иегова бо оолдарның кайызын-даа шиливээн. Шупту оолдарың бо бе?» — деп айтырган. «Давид дээр хеймер оглум бар. Ол ам хой кадарып турар» — деп, Иессей харыылаан. Давид чедип кээрге, Иегова Самуилге: «Ол бо-дур!» — дээн. Самуил Давидти келир үеде Израильдиң хааны кылдыр томуйлап, ооң бажынче үстү кудуп чагган.

Соонда израильчилер биле филистимнерниң аразынга дайын эгелээн. Филистимнер дээш дыка улуг ызыр-шыырак Голиаф деп дайынчы тулчуп турган. Хүнден хүнче Голиаф израильчилерни кочулап: «Мээң-биле кайы-бирээңер үнүп келгеш тулчуңар! Ол удуп алыр болза, кулдарыңар боор бис. А мен удуп алзымза, бистиң кулдарывыс боор силер» — деп алгырып турган.

Давид Израильдиң турлаанга келгеш, дайынчы акыларынга аъш-чем эккелген. Ол Голиафтың сөстерин дыңнап кааш, мынча дээн: «Мен ооң-биле тулчуйн!» Ынчалза-даа  Саул хаан: «Сен ам-даа аныяк сен!» — дээрге, «Иегова меңээ дузалаар» — деп, Давид харыылаан.

Саул Давидке куяк хевин кедирерге, оозу: «Меңээ мындыг хептиг эпчок чүве-дир» — дээн. Давид даш октаар хөм баан ап алгаш, дамыракче чорупкан. Аңаа ол беш хоюг дашты шилип алгаш, хавынче суп алган. Оон ол Голиафче удур халыпкан. Голиаф алгырган: «Бээр кел, оолчук! Сээң мөчү-сөөгүңнү куштарга, черлик амытаннарга каап берейн». Давид кортпайн: «Сенде хылыш, чыда бар. А мен сенче Иегованың ады-биле бар чор мен! Силер бистиң-биле эвес, а Бурган-биле тулчуп турар силер! Силерниң хылыш, чыдаларыңар Иеговага чүү-даа эвес деп, шупту улус көрүп каар. Ол силерни бистиң холувуска бериптер» — деп удур алгырган.

Давид дашты хөм баанче суккаш, бар шаа-биле ону чайып-чайып октаптарга, Голиафтың хаваанче даш кадалы берген. Голиаф черже өлүг доңгая барып дүшкен. Филистимнер корткаш, дезипкен. Иегова сеңээ база, Давидке ышкаш, дузалаар деп бүзүрээр сен бе?