Yehova wa sapuila Samuele hati: ‘Kuende konjo ya Jese. Umue pokati komãla vaye valume, eye wa nõliwa oku kala osoma ya va Isareli.’ Kuenje Samuele wa enda konjo ya Jese. Eci eye a mola omõla ukulu, wa kala oku sima hati: ‘Citava okuti umalẽhe u eye wa ñoliwa.’ Pole, Yehova wa sapuila Samuele hati u hayeko omunu nda nõla. Yehova wa popia hati: ‘Ame ndi vanja eci omunu a tuwa vutima, si vanji lika okumolẽha kuokilu.’

Jese wa nena ku Samuele omãla vaye epandu. Pole, Samuele wa popia hati: ‘Pokati kavo lomue wa nõliwa la Yehova. Ove hẽ o kuete omãla vakuavo valume?’ Jese wa popia hati: ‘Ndi kuete vali umue, eye omõlange kuasula okuti, Daviti. Eye o kasi loku lisa olomeme viange.’ Eci Daviti a iñila, Yehova wa sapuila Samuele hati: ‘Eye muẽle u-u!’ Samuele wa kapa ulela kutue wa Daviti, oco o waveke ndosoma yi ka viala va Isareli.

Noke yotembo yimue va Isareli va linga uyaki la va Filisiti, vana va kala locindululu cimue ci tukuiwa hati Goliata. Olonjanja viosi Goliata wa enda oku yola epembe va Isareli. Eye wa kaluka lolukandi hati: ‘Tumi kokuange ulume umue oco a liyake lame. Nda wa ndi yula, etu tu linga apika vene. Pole, nda ame ndo yula, ene vu linga apika vetu.’

Daviti weya kocilombo colohoka via va Isareli oku nena okulia ku va huvaye vana va kala asualali. Eye wa yevelela ovina Goliata a kala oku vangula kuenje wa popia hati: ‘Ndi liyaka laye!’ Soma Saulu wa popia hati: ‘Ove handi umalẽhe.’ Daviti wa tambulula hati: ‘Yehova o laika oku ndi kuatisa.’

 Saulu wa seteka oku eca ovimalẽho viaye ku Daviti, pole, Daviti wa popia hati: ‘Si tẽla oku yaka lovimalẽho evi.’ Daviti wa kuata epipili liaye peka kuenje wa enda polui. Eye wa nõla otuvawe tutãlo tu sielena, wa tu kapa vekolombele. Kuenje Daviti wa lupuka oku ka lisanga la Goliata. Ocindululu ca kaluka lolukandi citi: ‘Enju kokuange a kamõla. Ngeca ositu yove kolonjila viovilu kuenda kovinyama viovusenge.’ Daviti ka kuatele usumba. Eye wa kalukavo lolukandi hati: ‘Ove wiya kokuange losipata kuenda onjelia, pole, ame njiya kokuove vonduko ya Yehova. Ove ku kasi oku liyaka letu; o kasi oku liyaka la Suku. Omanu vosi va ka limbuka okuti Yehova o kuete unene wa velapo okuti osipata kuenda onjelia vi sule. Eye o ka eca vosi yene peka lietu.’

Daviti wa kapa ewe limue vepipili liaye kuenje wa limba longusu yalua. Lekuatiso lia Yehova ewe lia veta Goliata kuenje lia iñila vupolo waye. Ocindululu ca kupukila posi kuenje ca fa. Va Filisiti va tila lolupesi oco va popele omuenyo wavo. Ove hẽ wa kolela ku Yehova ndeci Daviti a linga?