Yehova a vhudza Samuele a ri: ‘Iyani nḓuni ya Isai. Muṅwe wa vhana vhawe u ḓo vha khosi ya Isiraele i tevhelaho.’ Nga zwenezwo Samuele a ya nḓuni ya Isai. Musi a tshi vhona mutukana wa u thoma, a humbula a ri: ‘Hoyu muṱhannga a nga vha e ene.’ Fhedzi Yehova a vhudza Samuele uri a si ene. Yehova a ri: ‘Ndi kona u vhona zwi re mbiluni ya muthu, hu si mbonalo ya nga nnḓa fhedzi.’

Isai a dovha a ḓisa vhaṅwe vhatukana vhawe vha rathi. Fhedzi Samuele a ri: ‘Yehova ho nga khetha na muthihi wavho. Naa ni kha ḓi vha na vhaṅwe vhana vha vhatukana?’ Isai a ri: ‘Ndi kha ḓi vha na muṅwe wa u fhedza, Davida. O bva o ya u lisa nngu.’ Musi Davida a tshi dzhena, Yehova a vhudza Samuele a ri: ‘Hoyu ndi ene!’ Samuele a shela mapfura kha ṱhoho ya Davida, a mu ḓodza uri a vhe khosi ya Isiraele ya tshifhingani tshi ḓaho.

Nga murahu ha tshifhinga, Vhaisiraele vho vha vha tshi khou lwa na Vhafilisita, vhe vha vha vhe na munna mulapfusa wa muhali ane a pfi Goliata, we a vha a tshi khou vha lwela. Goliata o vha a tshi goḓa Vhaisiraele maḓuvha oṱhe. O vhidzelela a ri: ‘Nḓiseleni munna ane a ḓo lwa na nṋe. Arali a nkunda, ri ḓo vha vhashumeli vhaṋu. Fhedzi arali nda mu kunda, ni ḓo vha vhashumeli vhashu.’

Davida a ya gammbani ya maswole a Vhaisiraele e na zwiḽiwa zwa vhakomana vhawe vhe vha vha vhe maswole. A pfa zwe Goliata a amba nahone a ri: ‘Ndi ḓo lwa nae!’ Khosi Saulo a ri: ‘Fhedzi ni tshee mutukana muṱuku.’ Davida a ri: ‘Yehova u ḓo nthusa.’

Saulo a lingedza u fha Davida tshiambaro tshawe tsha nndwa, fhedzi Davida a ri: ‘Ndi nga si  kone u lwa nga tshiambaro hetshi tsha nndwa.’ Davida a dzhia gatho ḽawe nahone a tsela mulamboni. A khetha matombo maṱanu a suvhelelaho nahone a a dzhenisa kha mukhwama. Davida a gidima a ya ha Goliata. Munna mulapfu a vhidzelela a ri: ‘Hee inwi mutukana, iḓani ngeno. Ndi ḓo ita uri ni ḽiwe nga zwiṋoni zwa ṱaḓulu na nga zwivhanda zwa ḓaka.’ Davida ho ngo vha na nyofho. Na ene o vhidzelela a ri: ‘Ni ḓa kha nṋe ni na banga na pfumo, fhedzi nṋe ndi ḓa kha inwi nga dzina ḽa Yehova. A ni khou lwa na riṋe, ni khou lwa na Mudzimu. Vhoṱhe vha re fhano vha ḓo vhona uri Yehova u na maanḓa u fhira banga na pfumo. U ḓo ni kumedzela riṋe.’

Davida a dzhenisa tombo kha gatho nahone a ḽi dzungudza nga maanḓa awe oṱhe. A tshi thuswa nga Yehova, a posa tombo nahone ḽa rwa phanḓa ya Goliata ḽa sunguvhela. Munna mulapfu a wela fhasi a fa. Nga murahu Vhafilisita vha shavha. Naa ni fulufhela Yehova, u fana na Davida?