Ginsidngan ni Jehova hi Samuel: ‘Pakadto ha balay ni Jesse. Usa han iya mga anak an sunod nga magigin hadi han Israel.’ Salit, kinadto hi Samuel kanda Jesse. Han nakita niya an suhag, naghunahuna hiya: ‘Sigurado nga ini nga batan-on an magigin hadi.’ Pero ginsidngan ni Jehova hi Samuel nga diri hiya. Hi Jehova nagsiring: ‘An ginkikita ko an aada ha kasingkasing han tawo, diri la an panggawas nga hitsura.’

Gindara ni Jesse an unom pa niya nga anak ngadto kan Samuel. Pero hi Samuel nagsiring: ‘Waray ha ira an ginpili ni Jehova. May anak ka pa ba nga lalaki?’ Hi Jesse nagsiring: ‘May-ada, an akon putó, hi David. Aadto hiya nag-aataman han akon mga karnero.’ Pag-abot ni David, ginsidngan ni Jehova hi Samuel: ‘Hiya an akon pinili!’ Gindihogan ni Samuel hi David sugad nga sunod nga hadi han Israel pinaagi ha pagbubo hin lana ha ulo ni David.

Paglabay hin pipira ka panahon, nagkaada girra an mga Israelita ngan an mga Pilisteohanon, nga may higante nga sundalo nga Goliat an ngaran. Kada adlaw, gintatamay ni Goliat an mga Israelita. Nagsinggit hiya: ‘Pakadia an usa niyo nga sundalo basi makig-away ha akon. Kon magdaog hiya, magigin uripon niyo kami. Pero kon ako an magdaog, magigin uripon namon kamo.’

Kumadto hi David ha kampo han mga Israelita basi magdara hin pagkaon ha iya kabugtoan nga mga sundalo. Hinbatian niya hi Goliat ngan nagsiring: ‘Ako an makikig-away ha iya!’ Hi  Hadi Saul nagsiring: ‘Pero bata ka pa.’ Binaton hi David: ‘Bubuligan ako ni Jehova.’

Iginpahuram ni Saul kan David an iya mga gamit ha pakig-away, pero hi David nagsiring: ‘Diri ko kaya makig-away kon ini an akon gamit.’ Ginkuha ni David an iya labyog ngan kumadto ha sapa. Nagpili hiya hin lima nga mahamis nga bato ngan iginbutang ito ha surudlan. Tapos, dinalagan hiya pakadto kan Goliat. An higante nagsinggit: ‘Pakadi, gutiay nga bata. Ipapakaon ko ikaw ha mga tamsi ngan ha ihalas nga mga hayop.’ Waray mahadlok hi David. Sininggit liwat hiya: ‘Kinanhi ka nga may espada ngan bangkaw, pero kinanhi ako ha ngaran ni Jehova. Diri ka nakikig-away kontra ha amon; nakikig-away ka ha Dios. Makikita han ngatanan nga aanhi nga hi Jehova mas makusog kay ha espada o ha bangkaw. Ihahatag niya kamo ha amon mga kamot.’

Nagbutang hi David hin bato ha iya labyog ngan iginlabyog ito ha bug-os niya nga kusog. Ha bulig ni Jehova, naigo hi Goliat ngan nahilubong an bato ha iya agtang. Natumba an higante ngan namatay. Tapos nagdadlagan an mga Pilisteohanon basi diri hira mamatay. Nasarig ka ba kan Jehova pariho kan David?