Ho Jehovah tamy Samoela: ‘Mindao amy Jese an̈y, fa araiky amy zanany lelahy ho loso panjakany Israely.’ Samoela nandeha tan̈y. Izy koa fa nahita araiky talan̈olo in̈y, izy nieritreritry: ‘Mety araiky ty donko nifidiny Jehovah.’ Ho Jehovah taminany: ‘Tsy izy io. Zaho kony mizaha ny an̈aty fô, fa tsy mizaha sora.’

Naboakany Jese koa zanany tsiota lahy. Ho Samoela: ‘Tsisy amindro io nifidiny Jehovah. Anao ma efa tsisy zanaka hafa eky?’ Ho Jese: ‘Miambin̈y ondrikondriky an̈y faralahinaka, Davida an̈arany.’ Davida koa fa navy, Jehovah nivolan̈a tamy Samoela: ‘Io izy aminany.’ Nisorany Samoela menaka lohany Davida, fotony izy hanjary panjakany Israely.

Niady tamy Filistiny Israelita aby io tafaranizen̈y. Nanan̈a maramila araiky fatatra be Filistiny aby io, Goliata an̈arany. Izy tsy voly nikatsiky ady tamindro Israelita aby io. Hoizy: ‘Mifidiana lelahy araiky aminaro hiady aminaka. Koa izy mandresy zaho, zahay hanjary andevonaro. Zaho koa maharesy izy, anaro hanjary andevonay.’

Davida nan̈atitry hanin̈y tamindry zokiny, fotony iro io maramila israelita. Ke ren̈iny volan̈a Goliata aby io. Hoizy: ‘Zaho hiady aminany!’ Ho Saoly Panjaka: ‘Anao kony mbala tsaiky e.’ Ho Davida: ‘Jehovah han̈ampy zaho.’

 Davida namiany Saoly raha findesiny miady, fa Davida nivolan̈a: ‘Tsy haiko mampiasa izio.’ Nangala pilotronany Davida, avio nandeha tamy ten̈arano nitsimpin̈y vato malamatra dimy, nataony tan̈aty sakanany. Izy amy zay nilomoay nan̈aton̈o Goliata. Ho Goliata: ‘Anao tsaiky hely io! Mavia atỳ fa anao ataoko hanin̈y voron̈o ndreky biby an̈atiala an̈y.’ Davida tsy navozo. Hoizy: ‘Anao mitondra sabatra ndreky saboa, fa zaho man̈aton̈o anao aminy an̈arany Jehovah. Anaro tsy miady aminay fa miady amy Zan̈ahary. Ho hitanaro fa Jehovah mahery mandilatra sabatra ndreky saboanaro io. Hataony mandresy anaro zahay.’

Nataony Davida vato tamy pilotronany, baka io naendriny mare be. Nataony Jehovah navoa laharany Goliata vato io, ke loaka laharanany. Izy amy zay koa fa lavo in̈y, izy naty. Nilefa iro Filistiny aby io. Matoky Jehovah karaha Davida ma anao?