Yehofa ŵamsalile Samuyele kuti, ‘Mjawule kunyumba ja Jese. Ligongo jumo jwa ŵanace ŵakwe caciŵa mwenye jwakuyicisya jwa Ayisalayeli.’ M’yoyo Samuyele ŵajawile kunyumba ja Jese. Ni paŵam’weni mwanace jwamkulungwa jwa Jese, jwalakwe jwaganisisye kuti, ‘Mnyamata jweleju ni jwakusosekwa kuŵa mwenye.’ Nambo Yehofa ŵamsalile Samuyele kuti nganaŵa jwelejo. Yehofa ŵamsalile kuti, ‘Ngusawonaga ya mumtima mwa mundu, ngaŵaga mwakuwonecela mundujo kusa.’

Jese ŵajigele ŵanace ŵane ŵakwana 6 ni kwawula nawo kwa Samuyele. Nambo Samuyele jwatite, ‘Pangali jwamsagwile Yehofa. Ana mkwete ŵanace ŵane?’ Jese ŵajanjile kuti, ‘Ngwete kamnyamata kacinondipile, lina lyakwe Daudi. Jwalakwe apite kukulisya ngondolo syangu.’ Daudi ali ayice, Yehofa ŵamsalile Samuyele kuti, ‘Ni jwelejo.’ Samuyele ŵamtasile mawuta Daudi mumtwe. Pandaŵijo ŵaliji kumsagula jwalakwe kuŵa mwenye jwamsogolo jwa Ayisalayeli.

Pali papite ndaŵi, Ayisalayeli ŵaputanaga ni Afilisiti. Mbali ja Afilisitijo kwaliji msilikali jwine juŵaliji cimundu cekulungwa mnope lina lyakwe Goliyati. Lisiku lililyose, Goliyati ŵanyosyaga Ayisalayeli. Jwalakwe jwaliji mgumila kuti, ‘Andumicisye mundu jwakuti mbutane najo. Naga jwalakwe akupunda cituŵe acikapolo ŵenu. Nambo naga ngupunda une, jemanja cim’ŵe acikapolo ŵetu.’

Daudi ŵajawile kuŵatamaga asilikali ŵa Ayisalayeli kukwapa yakulya acabale ŵakwe  ŵaŵaliji Asilikali. Jwalakwe jwapikene yaŵaŵecete Goliyati ni jwatite, ‘Cimbutane najo.’ Nambo mwenye Sauli ŵamsalile kuti, ‘Mli kamwanace.’ Daudi jwatite, ‘Yehofa cangamucisye.’

Sauli jwampele Daudi yakuwala yakwe yausilikali, nambo Daudi jwatite, ‘Ngaŵa mkuputa ngondo ndili mbwete yeleyi.’ Daudi jwajigele lukonji lwakwe lwakusomela maganga ni jwapite ku kasulo kukusagula maganga msano gakusalala ni jwagaŵisile mkacikwama kakwe. Kaneko Daudi jwapite kwa Goliyati. Cimundu cekulungwaco cagumisile kuti, ‘M’yice akuno kamnyamata. Cinamtende kuŵa cakulya ca yijuni ya mwinani soni yinyama yakwitinji.’ Nambo Daudi nganajogopa cilicose. Jwalakwe jwagumisile kuti, ‘Mkwika kwa une ni upanga soni lipanga, nambo une ngwika kwa mmwejo m’lina lya Yehofa. Ngamkulimbana ni m’weji nambo ni Mlungu. Jwalijose apano camanyilile kuti Yehofa ali jwamacili mnope kupunda upanga soni lipanga. Jwalakwe campelece mmwejo m’miyala mwetu.’

Daudi jwaŵisile liganga pa lukonji lwakwe lwakusomela maganga ni jwalipukunyisye ni kuliponya mwamacili. Ni cikamucisyo ca Yehofa, ligangalyo lyamsomile Goliyati pausyo mpaka lyajinjile mkati. Cimundu camacilico cagwile pasi ni kuwa. Kaneko Afilisiti ŵatisile. Ana mmwejo mkusamkulupilila Yehofa mpela muŵatendele Daudi?