Jéeobaeʼ tu yaʼalaj tiʼ Samuel: ‹Xeen tu yotoch Jesé. Juntúul tiʼ u paalal ken u beet u reyil Israel›. Samuel túuneʼ bin tu yotoch Jesé, le ka tu yilaj u hijo maas nojochoʼ, tu tuklaj: ‹In waʼalikeʼ letiʼe xiʼipal tsʼoʼok u yéeyaʼalaʼ›. Chéen baʼaleʼ Jéeobaeʼ tu yaʼalaj tiʼ Samuel maʼ letiʼiʼ. Tsʼoʼoleʼ tu yaʼalajtiʼ: ‹Teneʼ kin wilik jach bix u modos máak, maʼ chéen letiʼe bix u yilaʼal tu yóoʼkabiloʼ›.

Jeseeʼ tu taasaj yiknal Samuel le uláakʼ seis u túulal u paalaloʼ. Chéen baʼaleʼ Samueleʼ tu yaʼalaj: ‹Jéeobaeʼ maʼ u yéey mix juntúul tiʼ letiʼobiʼ. ¿Yaan wa uláakʼ a paalal?›. Jeseeʼ tu yaʼalaj: ‹Chéen ku bineltik David, le maas chichnoʼ, letiʼeʼ táan u kanáantik le tamanoʼoboʼ›. Le ka ook Davideʼ, Jéeobaeʼ tu yaʼalaj tiʼ Samuel: ‹¡Letiʼ lelaʼ!›. Samuel túuneʼ tu yalaj aceite tu pool David. Bey úuchik u yeʼesik letiʼ ken u beet u reyil Israeloʼ.

Ka máan kʼiineʼ, le israelitaʼoboʼ joʼopʼ u baʼateloʼob yéetel le filisteoʼoboʼ. Ichiloʼobeʼ yaan kaʼach juntúul soldado sen kaʼanal u baakel ku kʼaabaʼtik Goliat. Sáamsamaleʼ Goliateʼ ku burlartik kaʼach le israelitaʼoboʼ yéetel ku yawtiktiʼob: ‹Túuxteʼex juntúul máak utiaʼal ka baʼatelnak tin wéetel. Wa ku ganarkeneʼ, toʼoneʼ yaan k-meyajtikeʼex. Chéen baʼaleʼ wa kin ganareʼ, teʼex yaan a meyajtikoʼoneʼex›.

U sukuʼunoʼob Davideʼ soldadoʼob kaʼachi, le oʼolal bin u bis janal tiʼob teʼ tuʼux jelekbaloʼoboʼ. Teʼeloʼ tu yuʼubaj le baʼax ku yawtik Goliatoʼ, ka tu yaʼalaj: ‹Teen kin baʼateʼel tu yéetel›. Chéen baʼaleʼ rey Sauleʼ tu yaʼalajtiʼ: ‹Techeʼ chéen juntúul paalech›. David túuneʼ tu yaʼalajtiʼ: ‹Jéeoba kun áantken›.

 Saúl túuneʼ tu tsʼaa u majáant David u nuʼukulil u baʼateʼel, pero Davideʼ tu yaʼalajtiʼ: ‹Maʼ tu páajtal in baʼateʼel yéetel le baʼaloʼob in tsʼaamaʼ›. David túuneʼ tu chʼaʼaj u yúuntun. Lelaʼ junpʼéel nuʼukul ku meyaj utiaʼal u chʼin máak yéetel tuunich. Ka tsʼoʼokeʼ bin tu jáal junpʼéel ríoeʼ, ka tu yéeyaj cinco u pʼéelal tuunich wóolistak ka tu tsʼáaj ichil u sáabukaan. Ka joʼopʼ u bin u yáalkab tu tojil Goliat. Goliateʼ tu yawtaj: ‹Chan xiʼipal, koʼoten a wil baʼax kun úuchultech. Yaan in tsʼáaik a bakʼel utiaʼal ka jaantaʼak tumen le chʼíichʼoʼob yéetel tumen le baʼalcheʼob yanoʼob teʼ kʼáaxoʼ›. Davideʼ maʼ sajakchajiʼ, le oʼolal tu yaʼalajtiʼ: ‹Techeʼ taalech baʼateʼel tin contra yéetel junpʼéel espada bey xan yéetel junpʼéel lanza, chéen baʼaleʼ teneʼ táan in taal ta contra tu kʼaabaʼ Jéeoba. Maʼ táan a baʼateʼel tin contraiʼ, baʼaxeʼ tu contra Dios. Tuláakal le yanoʼob wayaʼ yaan u yilkoʼob maas yaan u poder Jéeoba ke tiʼ junpʼéel espada wa lanza. Letiʼ kun láaj kʼubkeʼex t-kʼab›.

Ka tsʼoʼokeʼ Davideʼ tu tsʼáaj junpʼéel tuunich tu yúuntuneʼ ka tu chʼinaj yéetel tuláakal u muukʼ. Yéetel u yáantaj Jéeobaeʼ, le tuunichoʼ jun taatsʼ bin tu táan poolal Goliat. Le oʼolal ka lúubeʼ kíimil tu beetaj. Le filisteoʼoboʼ púutsʼoʼob utiaʼal maʼ u kíimsaʼaloʼob. Davideʼ confiarnaj tiʼ Jéeoba. ¿Kux túun teech? ¿Ka confiar wa tiʼ Jéeoba jeʼex tu beetil Davidoʼ?