Davidajj Goliatar jiwaykäna uka qhepatjja Saúl reyejj ejercitopan pʼeqtʼirit jupar ajllïna. Davidajj walja guerranak atipjäna, wali uñtʼatäjjarakïnwa. Guerrat kuttʼanirïkäna ukhajja, warminakajj thoqtʼasisa, canttʼasisaw katoqapjjerïna: ‘Saúl reyejj 1.000 enemigonakaparuw atipji, Davidasti 10.000 enemigonakaparuw atipjaraki’ sasa. Ukatwa Saúl reyejj jupat envidiasjjäna, jiwayañ munjjarakïna.

Davidajj sum arpa tuktʼirïna. Mä urojj Saulatak tuktʼaskäna ukhaw Saulajj jiwayañatak mä lanzampi jaqtʼäna. Davidajj jankʼakiw altʼäna, lanzajj perqarukiw purïna. Uka qhepat walja kutiw Davidar jiwayañ yantʼäna. Ukatwa Davidajj wasarar escapjjäna.

Saulajj 3.000 soldadompiw Davidar arktäna. Davidampi jaqenakapamp imantasipkäna uka pachpa qollu pʼiyaruw Saulajj mantäna. Davidan jaqenakapajj akham sapjjänwa:  ‘Saular añchhit jiwayam’ sasa. Davidajj kʼachat jakʼachasisaw Saulan isip mä jiskʼa khareqäna, Saulajj janiw uk amuyaskänti. Ukampis Jehová Diosan ajllit reyipar ukham luratapat Davidajj arrepentisïnwa. Jaqenakapajj Saular jiwayañ munapjjäna ukhas jarkʼaqarakïnwa. Saulajj qollu pʼiyat mistjjäna ukhajja, Davidajj akham artʼäna: ‘Nayajj jiwayirismänwa, ukampis janiw jiwayksmati’ sasa. Ukat qheparojj ¿Saúl reyejj sumti Davidar uñj-jjpachäna?

Janiwa, jiwayañatak arknaqaskakïnwa. Mä arumajja, Davidampi Abisái sobrinopampiw Saulan campamentopar jamasat mantapjjäna. Saular cuidiri Abner sat soldados wal iktʼaskäna. Abisái sobrinopajj akham sänwa: ‘¡Jichhakuch jiwayañäni! Nay jiwayä’ sasa. Davidasti sänwa: ‘Jehová Diosaw jupar kunjamsa uñjaskani. Antisas lanzapampi uma apnaqañapampi aptasajj sarjjañäni’ sasa.

Davidajj mä qollur makatasaw Saulan campamentopar akham artʼanïna: ‘¡Abner! ¿Kunatsa reyir jan sum uñjkta? ¿Uma apnaqañapas lanzapas kawkinkisa?’ sasa. Saulajj Davidätap amuyasajj akham sänwa: ‘Jiwayitasmänwa, ukampis janiw uk lurktati. Jichhaw yatjjta, jumaw Israelan machaq reyipäjjäta’ sasa. Saulajj utaparuw kuttʼanjjäna. Ukampis janiw Saulan taqpach familiapajj Davidar uñisipkänti.