Dung mate si Goliat, dibahen Raja Saul ma si Daud gabe panglima ni tentarana. Sai monang do si Daud di parporangan. Gabe terkenal ma ibana. Molo mulak si Daud sian parporangan, manortori do angka borua huhut marende. Di ende i didok ma, ‘Marribu do dipamate si Saul, alai marpulu ribu do na dipamate si Daud!’ Gabe cemburu ma si Saul tu si Daud. Jala naeng dipamate ma si Daud.

Malo do si Daud marharpa. Sada tingki, marharpa ma si Daud di jolo ni Raja Saul. Tompu ma naeng dipatikkon raja i hujurna tu si Daud. Alai dielakkon si Daud do i, gabe pantik ma hujur i tu tembok. Jotjot do si Saul naeng mambunu si Daud. Alani i, martabuni ma si Daud tu padang belantara.

Diboan si Saul do 3.000 tentarana laho mamburu si Daud. Masuk do nasida tu inganan ni si Daud dohot angka  pangurupina. Didok pangurupina ma tu si Daud, ‘Saonari ma tingkina. Bunu ma si Saul i.’ Sipsip ma si Daud ro tu jonok ni si Saul jala diseat ma saotik punsu ni baju ni si Saul. Ndang diboto si Saul i. Alai dung i, manolsoli do si Daud ala ndang diargai ibana raja na dipillit Jahowa. Diorai si Daud do pangurupina mambunu si Saul. Dung dao nasida, gogo ma didok si Daud tu si Saul, sasintongna boi do dibunu ibana si Saul tingki i alai ndang olo ibana. Muba do roha ni si Saul?

Daong. Sai naeng dipamate si Saul do si Daud. Tingki borngin, masuk ma si Daud dohot si Abisai tu perkemahan ni si Saul. Tarpodom do pengawal ni si Saul, i ma si Abner. Didok si Abisai ma, ‘On ma tingkina, tabunu ma ibana.’ Alai didok si Daud ma, ‘Jahowa ma na manguhum ibana. Senjata dohot panginumanna i ma tabuat, dung i laho ma hita!’

Nangkok ma si Daud tu dolok di jonok perkemahan ni si Saul. Didok ma, ‘Abner, boasa ndang dijaga ho rajam? Didia do senjata dohot panginumanna?’ Diboto si Saul do, si Daud na manggora i. Didok ma, ‘Boi do nian dibunu ho ahu, alai ndang diulahon ho i. Huboto do, ho nama raja ni Israel.’ Dung i mulak ma si Saul tu istanana. Alai sasintongna, adong do keluarga ni si Saul na burju tu si Daud.