Pagkagadan ni David ki Goliat, ginibo siya ni Hading Saul na lider kan hukbo niya. Dakul na ralaban an ginana ni David, asin nagin sikat siya. Kada mauli si David hali sa giyera, minabarayle an mga babayi asin minakaranta: ‘Rinibo an nagadan ni Saul, si David manampulong ribo!’ Nauri si Saul kaya gusto niyang gadanon si David.

Matibayon magtugtog nin arpa si David. Kan pigtutugtugan niya si Saul, binudyak siya kaini. Nakailag si David, asin sa lanob tuminadok an budyak. Dakul na beses pang nautro an arog kaini. Kaya, nagdulag na si David asin nagtago sa disyerto.

Iiniba ni Saul an 3,000 niyang tawuhan para hanapon si David. Nagkataon na luminaog si Saul sa kuwebang pigtataguan ni David kaiba an mga tawuhan niya. Hininghingan si David kan mga tawuhan niya: ‘Pagkakataon mo na ini. Gadana na si  Saul.’ Naghikap si David pasiring ki Saul asin pinutulan su bado kaini. Dai iyan narisa ni Saul. Pakatapos, namundo si David ta dai niya iginalang an hading linahidan ni Jehova. Dai niya tinugutan an mga tawuhan niya na salakayon si Saul. Pagluwas ni Saul sa kuweba, inapod niya pa ngani ini asin sinabihan na may pagkakataon na kuta siyang gadanon ini pero dai niya ginibo. Mababago daw an isip ni Saul sa gusto niyang gibuhon ki David?

Dai. Padagos na hinanting ni Saul si David. Sarong banggi, naghikap palaog sa kampo ni Saul si David kaiba an pamangkin niyang si Abisai. Turog pati an guwardiya ni Saul na si Abner. Sabi ni Abisai: ‘Pagkakataon ta na ini! Ano, gadanon ko na siya?’ Nagsimbag si David: ‘Si Jehova na an bahala ki Saul. Kuanon ta sana an budyak niya saka laganan nin tubig.’

Nagsakat si David sa kaharaning bukid kun sain tanaw an kampo ni Saul. Nagkurahaw siya: ‘Abner, ta’no ta dai mo pigbabantayan an hadi nindo? Hain na an budyak niya saka laganan nin tubig?’ Nabosesan ni Saul si David, kaya nagsabi ini: ‘Dawa may pagkakataon ka nang gadanon ako, dai mo ginibo. Aram kong ika an sunod na magigin hadi kan Israel.’ Nagpuli si Saul sa palasyo niya. Pero bakong gabos sa pamilya ni Saul anggot ki David.