Ilyo Davidi aipeye Galyati, Imfumu Shauli yaebele Davidi ukuba umukalamba wa bashilika. Davidi alilwile inkondo ishingi kabili alecimfya, na bantu abengi balimutemenwe. Davidi nga abwela ku nkondo, abanakashi balecinda no kwimba abati: ‘Shauli aipaya abalwani amakana, na Davidi aipaya abalwani amakana amakumi!’ E ico Shauli alipatile Davidi kabili alefwaya no kumwipaya.

Davidi alelisha bwino sana insango. Bushiku bumo ilyo Davidi alelishisha Shauli insango, Shauli abulile ifumo no kulisukusa ukwali Davidi, pantu alefwaya ukumulasa. Lelo Davidi alilewike kabili ifumo lyalashile mu cibumba. Shauli talekele apo pene, alyeseshe pa miku iingi ukwipaya Davidi. Davidi asukile abutuka ayabelama mu matololo.

Shauli asendele abashilika 3,000 no kuya mu kufwaya Davidi. Shauli aileingila mu  lucengo mulya mwine Davidi na baume ali nabo babeleme. Abaume abo Davidi ali nabo bamwebele ati: ‘Ili e shuko wakwata ilya kwipaya Shauli.’ Davidi aile aleenda panono panono ukuya ukwali Shauli kabili aileputula insalu ku ca kufwala ico imfumu yafwele. Shauli taishibe ne fyalecitika. Pa numa Davidi alyumfwile ububi pa fyo acitile, pantu tacindike uo Yehova asalile ukuba imfumu. Davidi tasuminishe abaume bakwe ukwipaya Shauli. Alyebele na Shauli ati afwaya nga alimwipeye. Bushe ifi fyacitike fyalilengele Shauli aleka ukufwaya ukwipaya Davidi?

Awe. Shauli alitwalilile ukufwaya Davidi pa kuti amwipaye. Bushiku bumo mu nshita ya bushiku, Davidi no mwipwa wakwe Abishai baile mwi tenti umwali Shauli ninshi nalaala. Na Abnere uwalecingilila Shauli alileele. Abishai aebele Davidi ati: ‘Ili lishuko lyesu! Lekeni mwipaye!’ Davidi amwebele ati: ‘Yehova e ukapingula Shauli. Natusende fye ifumo no mutondo wa menshi tuleya no kuya.’

Davidi aninine pa lupili ulwali mupepi na pali itenti lya kwa Shauli. E lyo abilikishe ati: ‘Abnere, cinshi wacifililwa ukucingilila imfumu yobe? Uli kwi umutondo wa menshi ya kwa Shauli ne fumo lyakwe?’ Ilyo Shauli aumfwile ishiwi alishibe ukuti uulelanda ni Davidi, e ico amwaswike ati: ‘Nga wacilafwaya nga wacinjipaya, lelo taunjipeye. Nalishiba ukuti ni we ukaba imfumu ya bena Israele nga nafuma pa bufumu.’ Shauli alibwelelemo kwi sano. Lelo te bonse aba mu lupwa lwa kwa Shauli abapatile Davidi.