Human mapatay ni David si Goliat, gihimo siya ni Haring Saul nga lider sa mga sundalo. Kadaghan modaog si David sa mga gubat, ug misikat siya pag-ayo. Kada uli niya gikan sa gubat, manayaw ang mga babaye ug manganta: ‘Si Saul nakapatay ug linibo, ug si David nakapatay ug tinagpulo ka libo!’ Nasuya si Saul ug gusto niyang patyon si David.

Maayo kaayong motugtog ug alpa si David. Usa ka adlaw niana gitugtogan niya si Saul, pero gilabay siyag bangkaw ni Saul. Nakalikay si David, ug ang bungbong maoy naigo. Human niana, kadaghan gisulayan ni Saul nga patyon si David. Kadugayan, miikyas si David ug mitago sa kamingawan.

Gipangita ni Saul ug sa 3,000 ka sundalo si David aron patyon. Wala damha, mipahulay siya sa langob nga gitagoan pod ni David ug sa  iyang mga kauban. Ang mga kauban ni David miingon: ‘Tsansa na nimo ni nga patyon si Saul.’ Hinayhinay nga miduol si David kang Saul ug iyang giputlan ang sinina sa hari. Wala makabantay si Saul. Pero human niana, nakonsensiya si David nga wala niya tahora ang hari nga gipili ni Jehova. Wala siya mosugot nga hilabtan sa iyang mga kauban si Saul. Iya pa ganing giingnan si Saul nga puwede unta niyang patyon siya. Nausab kaha ang pagtratar ni Saul kang David?

Wala. Gusto gihapong patyon ni Saul si David. Usa ka gabii niana, si David ug ang iyang pag-umangkon nga si Abisai sekretong misulod sa kampo ni Saul. Bisan ang guwardiya ni Saul nga si Abner nakatulog. Si Abisai miingon: ‘Tsansa na nato ni! Unsa man, ako siyang patyon?’ Si David miingon: ‘Bahala na si Jehova kang Saul. Kuhaon lang nato ang iyang bangkaw ug sudlanag tubig, unya moadto na ta.’

Mitungas si David sa bukid nga duol sa kampo ni Saul. Misinggit siya: ‘Abner, nganong wala man nimo bantayi ang imong hari? Asa na man ang sudlanag tubig ug bangkaw ni Saul?’ Nakaila si Saul sa tingog ni David. Siya miingon: ‘Mapatay na unta ko nimo, pero wala nimo kana himoa. Nahibalo ko nga ikaw ang sunod nga hari sa Israel.’ Mipauli si Saul sa iyang palasyo. Pero dili tanan sa pamilya ni Saul ang nagdumot kang David.