Esi David wu Goliat megbe la, Fia Saul tsɔe ɖo eƒe aʋawɔlawo nu. David ɖu aʋa geɖe dzi eye wòxɔ ŋkɔ ŋutɔ. Ɣesiaɣi si David gbɔ tso aʋagbedzi la, nyɔnuwo doa go nɔa ha dzim, nɔa ɣe ɖum eye wonɔa gbɔgblɔm be: ‘Saul wu ame akpewo eye David wu ame akpe akpewo!’ Eya ta Saul va nɔ ŋu ʋãm David eye wòdi be yeawui.

David nya saŋkuƒoƒo nyuie. Gbe ɖeka esi David nɔ saŋku ƒom na Saul la, fia la da akplɔe. David de axa nɛ enumake eye akplɔ la tɔ glia. Le ema megbe Saul gadze agbagba zi geɖe be yeawu David. Mlɔeba David si yi ɖabe ɖe gbedzi.

Saul kplɔ aʋawɔla 3,000 eye woti David yome nɔ edim. Saul va ge ɖe agado aɖe si me David kple eƒe amewo  be ɖo la me. David ƒe amewo gblɔ nɛ dzaa be: ‘Mɔ ʋu na wò azɔ be nàwu Saul.’ David wɔ dzadzadza eye wòlã Saul ƒe awu toga. Saul mede dzesii o. Emegbe eve David be yemede bubu Yehowa ƒe amesiamina ŋu o. Melɔ̃ be yeƒe amewo nawu Saul o. Edo ɣli yɔ Saul gɔ̃ hã gblɔ nɛ be yeate ŋu awui esime mɔnukpɔkpɔ ʋu na ye hafi. Ðe Saul ƒe susu atrɔ eye magadi be yeawu David oa?

Ao. Saul gati David yome kokoko. Gbe ɖeka la, David kple nyruiyɔvia Abisai wɔ dzadzadza yi afi si Saul kple eƒe amewo le le zã me. Abner si nye Saul ŋudzɔla gɔ̃ hã dɔ alɔ̃. Abisai gblɔ be: ‘Mɔnukpɔkpɔ nyui aɖee nye esia! Na mawui.’ David gblɔ nɛ be: ‘Yehowa atu nu kple Saul. Na míatsɔ eƒe akplɔ kple tsigo ne míadzo.’

David lia to aɖe si dze ŋgɔ afi si Saul kple eƒe amewo le la. Edo ɣli ɖo ɖa gblɔ be: ‘Abner, nu ka tae mèdzɔ miaƒe fia la ŋu o? Afi kae Saul ƒe tsigo kple eƒe akplɔ le?’ Saul se David ƒe gbe eye wògblɔ be: ‘Àte ŋu awum hafi, gake mèwum o. Menya be wòe anye Israel-fia yeyea.’ Eya ta Saul trɔ yi eƒe aƒe me. Gake menye Saul ƒe aƒemetɔwo katãe lé fu David o.