Pagkatapos mapatay ni David si Goliat, ginhimo sia ni Hari Saul nga pangulo sang mga soldado. Nagdaug si David sa madamo nga inaway, kag nangin kilala gid sia. Kada magpauli si David halin sa inaway, nagagua ang mga babayi nga nagasaot kag nagakanta: ‘Linibo ang napatay ni Saul, pero si David tignapulo ka libo!’ Nahisa si Saul kay David gani gusto niya sia patyon.

Sagad si David magtokar sing arpa. Isa ka adlaw, sang nagatokar si David sing arpa kay Saul, ginbangkaw sia sang hari. Pero maabtik nga nakalikaw si David kag sa dingding nagdulot ang bangkaw. Pagkatapos sadto, madamo nga beses nga gintinguhaan ni Saul nga patyon si David. Sang ulihi, nalagyo si David kag nanago sa kamingawan.

Gin-upod ni Saul ang iya 3,000 ka tinawo para pangitaon si David. Natabuan nga nakasulod sia sa kueba nga ginapanaguan  ni David kag sang iya mga tinawo. Ang mga tinawo ni David naghutik sa iya: ‘Amo na ini ang tsansa mo nga patyon si Saul.’ Nagtiid si David pakadto kay Saul kag gin-utdan niya ang bayo sang hari. Wala makabatyag si Saul. Sang ulihi, ginkonsiensia si David kay wala niya ginrespeto ang ginpili nga hari ni Jehova. Wala niya ginpasugtan nga patyon sang iya mga tinawo si Saul. Nagsinggit pa gani si David kay Saul nga nagasiling nga may tsansa na kuntani sia nga patyon ini. Nagbag-o bala ang pagtan-aw ni Saul kay David?

Wala. Padayon nga ginpangita ni Saul si David. Isa ka gab-i, nagtiid si David kag ang iya hinablos nga si Abisai sa kampo nanday Saul. Bisan ang bantay ni Saul nga si Abner nagakatulog. Si Abisai nagsiling: ‘Tsansa ta na ini! Pasugti ako nga patyon sia.’ Si David nagsabat: ‘Si Jehova na ang bahala kay Saul. Kuhaon lang naton ang iya bangkaw kag suludlan sing tubig kag maglakat.’

Nagsaka si David sa malapit nga bukid nga ara sa ubos ang kampo nanday Saul. Nagsinggit sia sa ila: ‘Abner, ngaa wala mo ginproteksionan ang imo hari? Diin na ang suludlan sing tubig kag bangkaw ni Saul?’ Nakilala ni Saul nga tingog ini ni David, gani nagsiling sia: ‘Napatay mo na kuntani ako, pero wala mo ini ginhimo. Kabalo ko nga ikaw ang masunod nga hari sang Israel.’ Nagpauli si Saul sa iya palasyo. Pero indi tanan sa pamilya ni Saul akig kay David.