David tja za nokuzepa Goliat, Ombara Saul ye mu zika otjomuhongore wotjimbumba tje tjovita. David wa taara ovirwa ovingi nga tja rira omutjiukwa tjinene. Otjikando atjihe David tjaa zu kovita, ovakazendu aave ya okupunda nokuimbura kutja, ‘Saul wa zepa omayovi, nu David wa zepa omayovi omurongo!’ Saul wa uta okuṱeruru na David nu aa vanga okumuzepa.

David aa tjiwa okunyanda otjiharpe nawa. Eyuva rimwe ngunda David ama nyandere Saul otjiharpe, Saul we mu yumba nenga. David wa yepa nenga ari kaveta momira. Okuzambo Saul wa kondja ovikando ovingi okuzepa David. Korusenina David wa tupuka a kaṱara mokuti.

Saul wa toora otjimbumba tjovita tjovarwe 3 000 na kapaha David. Eye wa kahita mondimba David novarumendu ve  maave ṱara. Ovarwe vaDavid ve mu hokorisa nave tja: ‘Indwi oruveze oruwa kove okuzepa Saul.’ David wa honina Saul na kakonda otjikoro tjombanda ye. Saul kena pa muna. Kombunda yanao, David ee rivere tjinene kutja karaisire ondengero kombara yaJehova ndja toororwa. Eye kena pa yandjera ovarwe ve okurwisa Saul. Eye nandarire wa isana Saul ne mu raere kutja eye andaku nai wa zepa Saul. Nu hapo mape ya Saul a rundurura ongaro ye kuna David?

Kako. Saul wa kayenda komurungu okupaha David. Ouṱuku umwe David nomusya we Abisai va honina ave hiti mondanda yaSaul. Nandarire Abner, omutjevere waSaul tjandje wa rara ozomboṱu. Abisai wa tja: ‘Indwi oruveze oruwa ku eṱe! Ndje sa mbi mu zepe.’ David we mu zira na tja: ‘Jehova ongu ma vere Saul. Indjo tu toore enga re nokangwana ke komeva tu yende.’

David wa karonda kondundu imwe ndja ri popezu nozondanda zaSaul. Eye wa ravaera na tja: ‘Abner, ongwaye tji u ha tjeverere ombara yoye? Okangwana nenga raSaul vi ri pi?’ Saul wa zemburuka eraka raDavid na tja: ‘Ove otjo ndji zepa posiya kondji zepere. Me tjiwa kutja oove ngu mo rire ombara yaIsrael moruveze rwandje.’ Saul wa yaruka kondjuwo ye youhona. Posiya kaavehe meṱunḓu raSaul mba tondere David.