Thutha wa Daudi kũũraga Goliathu, Mũthamaki Saulu nĩ aamũtuire mũnene wa thigari ciake. Daudi nĩ aahootanire mbaara nyingĩ na akĩmenyekana mũno. Hĩndĩ ĩrĩa yothe Daudi aacokaga mũciĩ kuuma mbaara-inĩ, atumia maathũngũthaga na makaina ũũ: ‘Saulu nĩ oragĩte andũ ngiri nyingĩ, nake Daudi akoraga andũ ngiri makũmi maingĩ!’ Saulu nĩ aaiguagĩra Daudi ũiru na eendaga kũmũũraga.

Daudi nĩ oĩ gũthaka kĩnanda wega mũno. Mũthenya ũmwe rĩrĩa Daudi aathakagĩra Saulu kĩnanda, mũthamaki ũcio nĩ aamũikĩirie itimũ. Daudi nĩ eegitire o na ihenya na itimũ rĩu rĩgĩĩthecerera rũthingo-inĩ. Thutha ũcio Saulu nĩ aageririe kũũraga Daudi maita mangĩ maingĩ. Mũthia-inĩ, Daudi nĩ orire na agĩthiĩ kwĩhitha werũ-inĩ.

Saulu nĩ aathiire na thigari ciake 3,000 gũcaria Daudi. Nĩ aaingĩrire ngurunga-inĩ o  ĩrĩa Daudi meehithĩte na andũ ake atekũmenya. Andũ arĩa maarĩ na Daudi maamwĩrire ũũ: ‘Gaka nĩ kamweke gaku ga kũũraga Saulu.’ Daudi nĩ aacemire Saulu na agĩtinia gĩcoora kĩa nguo yake. Saulu ndaamenyire. Thutha ũcio Daudi nĩ aaiguire ũũru mũno tondũ ndonetie mũthamaki ũrĩa warĩ mũitĩrĩrie maguta gĩtĩo. Ndeetĩkĩrire andũ arĩa maarĩ nao matharĩkĩre Saulu. O na nĩ aanĩrĩire akĩra Saulu atĩ nĩ angĩamũragire tondũ nĩ aarĩ na kamweke. Hihi Saulu nĩ angĩacenjirie mawoni make kwerekera Daudi?

Aca. Aathiire o na mbere gũcaria Daudi. Ũtukũ ũmwe Daudi marĩ na Abishai nĩ maathiire mehithanĩtie nginya harĩa Saulu aarĩ. Abineri ũrĩa wagitagĩra Saulu aarĩ toro. Abishai eerire Daudi ũũ: ‘Gaka nĩ kamweke gaitũ! Reke ndĩmũũrage.’ Daudi akĩmwĩra ũũ: ‘Jehova nĩwe ũĩ ũrĩa egwĩka Saulu. Reke tuoe o itimũ na ndigithũ yake ya maĩ twĩthiĩre.’

Daudi aacokire akĩambata kĩrĩma kĩrĩa kĩang’ethanĩire na harĩa Saulu maarĩ. Aanĩrĩire akiuga ũũ: ‘Abineri, wagire kũgitĩra mũthamaki nĩkĩ? Ĩ ha ndigithũ na itimũ rĩa Saulu?’ Saulu nĩ aamenyire mũgambo wa Daudi na akĩmwĩra: ‘Nĩ ũngĩnjũragire, no ndũneka ũguo. Nĩ njũĩ atĩ nĩwe ũgatuĩka mũthamaki wa Isiraeli thutha wakwa.’ Saulu nĩ aacokire gwake mũciĩ. No ti andũ othe famĩlĩ-inĩ ya Saulu maamenete Daudi.