Kioso Davidi kia jibha Ngoliia, o Sobha Saulu ua mu solo kala kabhitangu ka masoladi mê. Davidi ua tolola ita iavulu, kiki kia mu bhangesa ku kala ni fuma iavulu. Kioso Davidi kia kexile mu vutuka mu ita, o ahatu akexile mu kina ni kuimba exi: ‘Saulu ua jibha jimidi, maji Davidi ua jibha kuinhi dia jimidi!’ Saulu njinda ia mu kuata, iú ua sotele ndunge phala kujibha Davidi.

Davidi ua kexile mu xika kiambote o kambánza. Saí kizuua kioso Davidi kia kexile mu xika muimbu phala Saulu, o sobha ua takula o sosa iê kua Davidi. Davidi ua lenge ni lusolo, anga o sosa ia naminina ku pálede ia inzo. Mu veji javulu, Saulu ua soto dingi jindunge ja mukuá phala kujibha Davidi. Mu kusuka-ku, Davidi ua lenge iú ua di suekele mu kikangalakata.

Saulu uambatele kifuxi kia 3.000 ja masoladi anga uai mu kenga Davidi. Muéne ua bokona mu dibanda mua kexile Davidi ni  maiala mê. O maiala a Davidi a mu fuetela: ‘Kiki o kithangana kié phala kujibha Saulu.’ Ni kuzomba, Davidi uai katé bhu kididi bhua kexile Saulu, anga ua tandula o divunga diê. Saulu ka mu monene. Kioso kia bhange kiki, Davidi ua divu kiaiibha, mukonda ka xile o sobha a mu undile kuala Jihova. Muéne kehela o maiala mê kujibha Saulu. Muéne uexana Saulu ni dizui dia suina, mu ku mu tangela kuila, ueji jibha Saulu kioso kiexile ni kithangana. O kuila Saulu ua lungulula o ukexilu uê ua kumona Davidi?

Kana. Saulu ua kolokota mu kuzukutisa Davidi. Saí kizuua mu usuku, Davidi ni muebhu’ê Abisai a zombo dingi mu kididi mua kexile Saulu ni masoladi mê. Katé muene ni Abinele, kapanga ka Saulu, uexile mu zeka. Abisai uambe: ‘Kiki o kithangana kietu! Tu mu jibhe kiá.’ Davidi ua mu vutuila: ‘Jihova ua-nda batula o maka ni Saulu. Tu katule ngó o sosa ni kambinda kê ka menha ni tuende.’

Davidi ua bande ku mulundu kua zukamene o kididi mua kexile Saulu ni masoladi mê. Ku thandu’a mulundu muéne ua dikola: ‘Abinele, mukonda diahi, ki ua lange sobha iê? Kuebhi kuala o kambinda ni sosa ia Saulu?’ Saulu uejidile o dizui dia Davidi, anga uambe: ‘Eie ueji tena ku ngi jibha, maji ku ki bhange. Eme ngejiia kuila, ua-nda ngi bhingana mu kukala o sobha ia Izalaiele.’ Saulu ua vutuka ku bhata diê. Maji ko athu oso ku muiji ua Saulu a zembele Davidi.