Afta Devid kil Golaya, Kiŋ Sɔl mek Devid de bifo in sojaman dɛn. Devid bin win bɔku wɔ dɛn, ɛn ɔlman bin sabi am. Ɛnitɛm we Devid kɔmɔt fɛt wɔ, di uman dɛn kin dans ɛn siŋ se: ‘Sɔl dɔn kil wan tawzin sojaman dɛn ɛn Devid dɔn kil tɛn tawzin sojaman dɛn!’ Sɔl bigin fɔ jɛlɔs Devid, ɛn i bin want fɔ kil am.

Devid bin rili sabi aw fɔ ple myuzik wit wan tin we dɛn kin kɔl ap. Wan de we Devid de ple ap fɔ Sɔl, Sɔl sɛn in spia pan am. Devid balans am kwik, ɛn di spia chuk di wɔl. Afta dat, Sɔl bin tray bɔku tɛm fɔ kil Devid. Afta sɔm tɛm, Devid rɔnawe ɛn go ayd na wan dɛzat.

Sɔl bin tek 3,000 sojaman dɛn fɔ go fɛn Devid fɔ kil am. I bin go ɛnta na di kev usay Devid ɛn in sojaman dɛn bin ayd. Devid in sojaman dɛn tɛl am saful  wan se: ‘Dis na yu chans fɔ kil Sɔl.’ Devid go nia Sɔl ɛn kɔt smɔl pat pan in klos. Sɔl nɔ bin no. Afta dat, Devid fil bad bikɔs i nɔ bin sho rɛspɛkt fɔ di kiŋ we Jiova bin dɔn anɔynt. I nɔ bin alaw in sojaman dɛn fɔ atak Sɔl. I bin ivin tɛl Sɔl se i fɔ dɔn kil Sɔl we i gɛt di chans. Sɔl go chenj in maynd bɔt di kil we i want fɔ kil Devid?

Nɔ. Sɔl bin kɔntinyu fɔ fɛn Devid fɔ kil am. Wan nɛt Devid ɛn in nɛfyu Abishay bin ayd ɛn go insay Sɔl in kamp. Ivin Abna we na Sɔl in gaydman bin de slip. Abishay tɔk se: ‘Dis na wi chans! Mek lɛ a kil am.’ Devid ansa am se: ‘Jiova go fɛt Sɔl fɔ wi. Lɛ wi jɔs tek in spia ɛn wata bɔtul ɛn go.’

Devid klem ɔp wan mawntin we bin mek i de si insay Sɔl in kamp. I ala lawd wan se: ‘Abna, wetin mek yu nɔ de protɛkt yu kiŋ? We Sɔl in wata bɔtul ɛn in spia?’ Sɔl bin no se na Devid in vɔys, so i se: ‘Yu fɔ dɔn kil mi bɔt yu nɔ du am. A no se na yu gɛt fɔ bi di nɛks kiŋ na Izrɛl.’ Sɔl bin go bak na in os. Bɔt nɔto ɔlman na Sɔl in famili bin et Devid.