ဖဲ​စီၤ​ဒၤဝံး​မၤသံ စီၤကၤလယး​ဝံၤ​အလီၢ်​ခံ စီၤပၤ​စီလူး​ပာ်ထီၣ်​အီၤ​လၢ သုးခိၣ်​လီၤ. စီၤ​ဒၤဝံး​ဒုးတၢ်​နၢၤ​အါ​ဘျီ​အဃိ အ​မံၤဟူသၣ်ဖျါ​ထီၣ်ဝဲ​ဒိၣ်မး​လီၤ. ဖဲ​စီၤ​ဒၤဝံး​ဒုးတၢ်​ဝံၤဒီး ဟဲက့ၤ​လၢ​ဟံၣ်​အခါ ပှၤ​ပိာ်မုၣ်​တဖၣ်​ဟဲထီၣ်​ဂဲၤကလံၣ် ဒီး​သးဝံၣ်​တၢ်​လီၤ. အဝဲသ့ၣ်​သးဝံၣ်​ထီၣ်ဝဲ​လၢ– ‘စီၤ​စီလူး​မၤသံ​ပှၤလၢ အ​ကထိ မ့မ့ၢ်​စီၤ​ဒၤဝံး​န့ၣ် မၤသံဝဲ​ပှၤလၢ​အ​ကလး​တဖၣ်​လီၤ.’ လၢတၢ်န့ၣ်​အဃိ စီၤ​စီလူး​သးက့ၣ်​ဝဲ စီၤ​ဒၤဝံး​ဒီး​အဲၣ်ဒိး မၤသံ​အီၤ​လီၤ.

စီၤ​ဒၤဝံး​ဒ့​တနၢ်​သ့ဝဲ​ဂ့ၤဂ့ၤ​လီၤ. ဘၣ်​တနံၤ ဖဲ​စီၤ​ဒၤဝံး​ဒ့​ဝဲ​တနၢ်​လၢ စီၤ​စီလူး​အဂီၢ်​အခါ စီၤပၤ​ကွံာ်​အီၤ​လၢ​ဘီ​လီၤ. တဘျီဃီ​န့ၣ် စီၤ​ဒၤဝံး​ပ​လဲၤ​အသး ဒီး​ဘီ​န့ၣ်​လဲၤ​ဘၣ်​ဝဲ​တၢ်ဒူၣ်ကပၤ​လီၤ. ဖဲ​န့ၣ်​ဝံၤ​အလီၢ်​ခံ စီၤ​စီလူး​ဃုမၤ​သံဝဲ​စီၤ​ဒၤဝံး​အါ​ဘျီ​လီၤ. လၢခံ စီၤ​ဒၤဝံး​ဃ့ၢ်ကွံာ်​ဝဲ​လၢ​အယံၤ ဒီး​လဲၤ​အိၣ်​ခူသူၣ်​ဝဲ​လၢ​ပှၢ်မုၢ်ကနၢ​အ​ပူၤ​လီၤ.

စီၤ​စီလူး​ကိးထီၣ်​အ​ပှၤသုးဖိ​အဂၤ ၃,၀၀၀ ဒ်သိး​က​လဲၤ​ဃုမၤ​သံ​စီၤ​ဒၤဝံး​အဂီၢ်​လီၤ. စီၤ​စီလူး​နုာ်လီၤ​ဝဲ​ဆူ လ့ကအိ​အ​ပူၤ​ဖဲ စီၤ​ဒၤဝံး​ဒီး​အ​ပှၤသုးဖိ​တဖၣ် အိၣ်​ခူသူၣ်​ဝဲ​အလီၢ်​န့ၣ်​လီၤ. စီၤ​ဒၤဝံး​အ​ပှၤသုးဖိ​တဖၣ် တဲဘၣ်​အီၤ​လၢ– ‘န​မၤသံ​စီၤ​စီလူး န့ၢ်လံ.’ စီၤ​ဒၤဝံး​လဲၤ​ဃီၤ​ဝဲ​ကယီ​ကယီ ဆူ​စီၤ​စီလူး​အ​အိၣ် ဒီး​ကူးဝဲ​စီၤ​စီလူး အ​ဆ့ကၤ​အ​ခီၣ်ထံး​တစဲး​လီၤ. ဒီး​စီၤ​စီလူး တ​သ့ၣ်ညါ​တၢ်​နီတမံၤ​ဘၣ်. ဖဲ​န့ၣ်​ဝံၤ​အလီၢ်​ခံ စီၤ​ဒၤဝံး​သးဘၣ်ဒိ​ဝဲ​ဒိၣ်မး မ့ၢ်​လၢ အ​တ​ပာ်ကဲဝဲ စီၤပၤ​လၢ​ယဟိဝၤ​ယွၤ ဃုထၢ​ထီၣ်ဝဲ​အဃိ​လီၤ. ဒီး​စီၤ​ဒၤဝံး​တ​ဟ့ၣ်​အခွဲး​လၢ အ​ပှၤသုးဖိ​တဖၣ် က​မၤသံဝဲ​စီၤ​စီလူး​ဘၣ်. စီၤ​ဒၤဝံး​ကိးပသူ​ထီၣ်​ဆူ စီၤ​စီလူး​အ​အိၣ် ဒီး​တဲဘၣ်​အီၤ​လၢ ဖဲ​န​အိၣ်​လၢ​လ့ကအိ​ပူၤ​အခါ ယ​မ့ၢ်​အဲၣ်ဒိး​မၤသံ​နၤ​န့ၣ် ယ​မၤန့ၢ် ဘၣ်ဆၣ် ယ​တ​မၤ​ဘၣ်. လၢတၢ်န့ၣ်​အဃိ မ့ၢ်​စီၤ​စီလူး​ဆီတလဲ အ​တၢ်​ပာ်သူၣ်​ပာ်သး​လၢ စီၤ​ဒၤဝံး​အ​ဖီခိၣ်​စ့ၢ်ကီး​ဧါ.

စီၤ​စီလူး​တဆီ​တ​လဲ​ဘၣ်. အဝဲ​ဆဲး​ဃုမၤ​သံဝဲ စီၤ​ဒၤဝံး​လီၤ. ဘၣ်​တနၤ စီၤ​ဒၤဝံး​ဒီး​အ​ဖိဒိၣ်ခွါ စီၤအဘံၡဲၤ လဲၤနုာ်​လီၤ​ဝဲ​ကယီ​ကယီ​လၢ စီၤ​စီလူး​အိၣ်​တၢ်လီၢ်​န့ၣ်​လီၤ. စီၤ​အ​ဘံ​လၢ​အမ့ၢ်​ပှၤလၢ အဘၣ်​အိၣ်ခိး​ကွၢ်ဝဲ စီၤ​စီလူး​န့ၣ် မံ​ဘၣ်​အသး​လီၤ. စီၤအဘံၡဲၤ​တဲဘၣ် စီၤ​ဒၤဝံး​လၢ– ‘အဝဲ​အိၣ်​လၢ​ပ​စု​ပူၤ​လံ, ယ​က​မၤသံ​အီၤ​တထံၣ်​ဧဲၣ်.’ စီၤ​ဒၤဝံး​တဲ​ဆၢက့ၤ​အီၤ​လၢ– ‘ယဟိဝၤ​ယွၤ​က​ဟ့ၣ်ကၣ် စီၤ​စီလူး​လီၤ. ပ​က​ဟံးန့ၢ်​ထဲ​အဘီ, အထံ​အီ​ဒၢ ဒီး​ပ​က​က့ၤ​လီၤ.’

စီၤ​ဒၤဝံး​လဲၤထီၣ်​ဆူ ကစၢၢ်​ခိၣ်​လၢ​အ​အိၣ်ဘူး​ဒီး စီၤ​စီလူး​အိၣ်​တၢ်လီၢ်, ဒီး​ဖဲ​န့ၣ်​အခါ စီၤ​ဒၤဝံး​ကွၢ်စိ​လီၤ​တၢ်​ဆူ စီၤ​စီလူး​အ​အိၣ် ဒီး​ကိးပသူထီၣ်​ဝဲ​လၢ– ‘စီၤ​အ​ဘံ​ဧၢ, ဘၣ်​မနုၤ​အဃိ န​တ​ကွၢ်ထွဲ​န​စီၤပၤ​လဲၣ်. ခဲအံၤ စီၤ​စီလူး​အထံ​အီ​ဒၢ ဒီး​အ​နး​အိၣ်​ဖဲလဲၣ်.’ စီၤ​စီလူး​နၢ်ဟူ​ဝဲ စီၤ​ဒၤဝံး​အ​ကလုၢ် ဒီး​တဲဝဲ​လၢ– ‘န​မ့ၢ်​အဲၣ်ဒိး​မၤသံ​ယၤ​န့ၣ် န​မၤသံ​ယၤ​န့ၢ် ဘၣ်ဆၣ် န​တ​မၤသံ​ယၤ​ဘၣ်. အဃိ ယ​သ့ၣ်ညါ​လၢ န​က​ကဲထီၣ်​ဘၣ် ပှၤ​အံၣ်စရ့လး​ဖိ​အ​စီၤပၤ​လၢခံ​တဂၤ​လီၤ.’ ဝံၤဒီး စီၤ​စီလူး​က့ၤဝဲ​ဆူ​အ​နီ​ပူၤ​လီၤ. ဘၣ်ဆၣ် စီၤ​စီလူး​အဟံၣ်​ဖိ​ဃီဖိ တ​သးဟ့ စီၤ​ဒၤဝံး​ကိးဂၤ​ဒဲး​ဘၣ်.