Vava Davidi kavonda Ngoleyate, o Saulu wa ntinu wansola se mfumu a makesa mandi. Davidi watoma zayakana kwa wantu wau vo vita zayingi kasundanga. Konso ntangwa katukanga kuna vita, akento bakinanga yo yimbila vo: ‘O Saulu ovondele mazunda, Davidi ovondele mazunda ye mazunda.’ Saulu wayantika muena Davidi kimpala yo vava kumvonda.

Davidi watoma zaya sika e kokolo. Lumbu kimosi ekolo Davidi kasikilanga Saulu e kokolo, o ntinu Saulu wantuba e dionga. Davidi wavenga dio, e dionga diasomama muna yaka. Tuka wauna, Saulu nkumbu miayingi kavavanga vonda Davidi. Muna kuma kiaki, Davidi watina yo kwenda swekama muna makanga.

Saulu wanata 3000 ma makesa mu kwenda konda Davidi. Bakota muna  nduka una Davidi ye makesa mandi baswekamena. Makesa ma Davidi bamvovesa vo: ‘Owau, obakidi e lau dia vonda Salu.’ Davidi wazenga tini kia mvuatu a Saulu. Kansi, Saulu kabakula wo ko. I bosi, Davidi wakendalala kikilu wau kalembi zitisa e kuswa kia Yave. Kayambula ko vo makesa mandi bavonda Saulu. Wabokela nkutu Saulu yo kumvovesa vo lau kakedi diau dia kumvonda. Nga Saulu wasoba e ngindu zandi mu kuma kia Davidi?

Ve, kasoba ngindu ko. Saulu wakwamanana vava Davidi. Lumbu kimosi muna fuku, Davidi yo Abisai wa mwan’andi ankazi bayenda vana fulu kina Saulu kaswekamena. Kana nkutu Abene wa nyingidi a Saulu, waleka kakala. Abisai wavova vo: ‘Tubakidi e lau. Yambula yamvonda.’ Davidi wavutula vo: ‘Yave ofundisa Saulu. Tubonga kaka e dionga ye nkalu andi a maza twenda kweto.’

Davidi watomboka vana mongo wakala lukufi ye nduku una wakala Saulu. Wakaza vo: ‘Abene, ekuma kutanini mfumu aku ko wa ntinu? Akweyi kwina e dionga ye nkalu a maza ya Saulu?’ Saulu wabakula vo yayina nding’a Davidi. Wavova vo: ‘Wakala ye lau dia kumponda, kansi kuvangidi wo ko.’ Owau, nzeye wo vo ngeye osinga kala ntinu muna Isaele.’ Saulu wavutuka kuna nzo andi. Kansi, ke wantu awonso ko muna kanda dia Saulu bamenganga Davidi.