Bang’ ka Daudi nosenego Goliath, Ruoth Saulo nokete mondo obed jatend jolweny. Daudi ne oloyo lwenje mang’eny, kendo ne obedo gi huma ahinya. Samoro amora ma Daudi ne oduogo koa e lweny, mon ne romone ka gimiel, kendo ka giwer niya: ‘Saulo osenego ji alufe; Daudi to osenego ji alufe gi alufe!’ Nyiego nomako Saulo, kendo nodwaro nego Daudi.

Daudi nong’eyo goyo thum ahinya. Chieng’ moro ka nogoyo ne Saulo thum, Saulo ne obaye gi tong’. Kata kamano, Daudi nomiso mi tong’no ochwoyo kor ot. Bang’ mano, Saulo notemo nego Daudi nyading’eny. Omiyo, Daudi ne oringo odhi pondo e thim.

Saulo nowuok gi jolweny 3,000 mondo odhi omany Daudi. Nitie chieng’ ma nodonjo e rogo moro kokia ni Daudi gi joge nopondo kanyo. Joma ne nigi Daudi  nokuodho ne Daudi ni: ‘Ma e thuolo mar nege.’ Daudi nolidho nyaka kama Saulo ne nitie, moliro bath law Saulo, to Saulo ne ok ofwenyo. Bang’e, chuny Daudi nochandore ahinya nikech noneno ni timneno ne ok nyis luor ne ruoth ma Jehova nowalo. Notamo joge mondo kik gineg Saulo. Kae to ka en mabor matin, nonyiso Saulo niya: ‘Ne an gi thuolo mar negi, to ok atimo kamano.’ Be Saulo ne owere gi Daudi?

Ooyo. Ne odhi nyime manyo Daudi mondo onege. Chieng’ moro gotieno, Daudi gi watne ma Abishai nolidho ma gidonjo kama Saulo gi joge ne nitieree. Nindo ne osetero ji te ma ne ni kanyo. Kata mana Abner ma ne rito Saulo be ne tomo nindo. Abishai nonyiso Daudi ni: ‘Wang’ni to kik waweye! We anege.’ To Daudi nodwoke ni: ‘Weri aweya kode. Jehova biro neno kaka time. Wakaw mana tonge kod jag mare mar pi, kae to wadhi adhiya.’

Daudi ne oidho wi got ma ne nitie machiegni gi kama Saulo gi jolwenyge ne nitie. Ne okok matek ni: ‘Abner, ang’o momiyo ne ok irito ruoth e yo maber? Ere tong Saulo kod jagne?’ Saulo ne ofwenyo dwond Daudi, mi owacho ne Daudi kama: ‘Dine inega, to ok nitimo kamano. Ang’eyo ni ibiro bedo ruoth bang’a.’ Saulo nodok dala. To be ing’eyo ni ne nitie ng’ato e od Saulo ma ne mor ahinya gi Daudi?