Kema David ya kimiktijtoya Goliat, tlanauatijketl Saúl kitekimakak ma kinyakana itlateuijkauaj. David miakpa tlatlanki kema tlateuiyaya uan kampa ueli kiixmatiyayaj. Kema yauiyaya kinonteuia ikualankaitakauaj uan tlakuepiliyaya, siuamej nochipa kionnamikiyayaj, mijtotijtiauiyayaj uan uikatiauiyayaj: “Saúl kinmiktijtok se mil ikualankaitakauaj, uan David kinmiktijtok matlaktli mil ikualankaitakauaj”. Yeka Saúl pejki kikualankaita David uan kinekiyaya kimiktis.

David kuali kitsotsonayaya arpa. Se tonali, kema kitlatsotsoniliyaya tlanauatijketl Saúl, nopa tlanauatijketl kimajkauilik se kuatlamintli. David nimantsi mopachok uan amo kiasik, uan nopa kuatlamintli tlatskito ipan kaltechtli o tlapepecholi. Teipa, Saúl miakpa kitemolik kenijkatsa kimiktis David. Yeka, David mochololtik uan motlatito kampa uaktok tlali.

Saúl kitemoto David uan yajki ininuaya  3,000 itlateuijkauaj. Saúl kalakito kampa David uan itlateuijkauaj motlatijtoyaj. David itlateuijkauaj ichtakatsi kiiljuijkej: “Nama uelis tijmiktis Saúl”. David yolik kinechkauik Saúl, uan maske kitekilik se kentsi iyoyo, Saúl amo kimatki. Teipa, David tlauel kiyolkokok tlen kichijtoya pampa kinextijtoya amo kitlepanitayaya nopa tlanauatijketl katli Jehová kitlapejpenijtoya. Yeka kiniljuik itlateuijkauaj amo tleno ma kichiuilikaj Saúl. Kema Saúl kiski kampa motlatijtoya, David chikauak kiiljuik: “Ueltoskia nimitsmiktis uan amo nijchijki”. ¿Timoiljuia Saúl ayokmo kikualankaitak David?

Amo. Saúl nojua kinekiyaya kimiktis. Uajka, se youali, David uan imachkone Abisai kalajkej kampa Saúl itstoya uan amo aka kinitak. Abner, katli kimokuitlauiyaya Saúl, nojkia kochtoya. Abisai kiiljuik: “¡Nama uelis tijmiktisej Saúl! Xinechkaua ma nijmikti”. Uan David kinankilik: “Jehová kitlajtolsenkauas. San xijkuilijteua iateko uan nopa kuatlamintli”.

Teipa David tlejkok ipan se tepetl tlen nechka eltoya. Nopaya nesiyaya kampa itstoyaj Saúl uan itlateuijkauaj. Uan David chikauak kiijtok: “¡Abner! ¿Kenke amo tijmokuitlauik motlanauatijka? ¿Kanke eltok iateko uan nopa kuatlamintli tlen ya kitekiuia?”. Saúl nimantsi kikajki eliyaya David katli kamanaltiyaya, uan kiiljuik: “Ueltoskia tinechmiktis, uan amo tijchijki. Nama nijmati ta titlanauatis ipan Israel”. Uajka Saúl tlakuepilik kampa tlanauatiyaya. Amo nochi Saúl ichampoyouaj kikualankaitayayaj David.