Dhavhidhi paakapera kuuraya Goriati, Mambo Sauri vakamudira inga mutungamiriri o masoca ake. Dhavhidhi wakawina hondo zinji, zve wakaguma pa kuzivika maningi. Pacina kukana-kana Dhavhidhi paiviya kubva ku hondo, vanakaji vaibuda kunja kuti vatambe no kuimba veciti: ‘Sauri wakauraya zviuru zvo vandhu, Dhavhidhi wakauraya gumi ro zviuru!’ Sauri wakava no ushanje na Dhavhidhi zve wakada kumuuraya.

Dhavhidhi waikwanisa maningi kurija arpa. Njiku imweni, Dhavhidhi paairija arpa kuitira Sauri, Mambo vakamukhandirira mukhondo. Dhavidhi wakambzenga pa nguva yondhoyo zve mukhondo wiya wakabaya pa biravira. No zvapera izvi, pa bvaza jakawanda Sauri wakaeja kuuraya Dhavhidhi. Pa mukuvo umweni, Dhavidhi wakatiza woenda koofindara muzvipare.

Sauri wakatora cikwata co masoca co 3.000 zvo vanarume kwenda koonyanga Dhavhidhi. Zvakaitika kuti iyena anghwine pa  ndau imweyo yainga yakavanda Dhavhidhi no vanarume vake. Vanarume va Dhavhidhi vakati kwaari: ‘Uu i mukana wako kuti uraye Sauri.’ Dhavidhi wakakwederera Sauri zve wakaceka cidimbu co nguvo ya mambo. Sauri azivi kuzvivona. Pasure pazvo, Dhavhidhi azivi kujizwa ushoni ngo kutama kureremeja mambo wakazojwa ndi Jehovha. Iyena aazivi kutendera kuti vanarume vake vahwise Sauri. Pikija iyena wakatodana Sauri, ecimubvunja kuti iyena wainga no mukana wo kumuraya. Kureva kuti Sauri wakacinja murangariro wake ngo pamusoro pa Dhavhidhi here?

Aazivi. Sauri wakaramba ecinyanga Dhavhidhi. Pa usiku umweni, Dhavhidhi no muzukuru wake Abhisai vakanghwina mu akampamento ya Sauri. Pikija Abhineri murindiri wa Sauri, wainga wakavata. Abhisai wakati: ‘Uu ndi mukana wedu! Ndisiei ndimuuraye.’ Dhavhidhi wakamupingura kudari: ‘Jehovha nganozodavira Sauri. Itusu ngatitore mukhondo wake no cijuvi cake co kumwa tipinde.’

Dhavidhi wakakhwira pa dundhu phedo kuti avone akampamento ya Sauri. Iyena wakamimira eciti: ‘Abhineri, ngenyi auzivi kungwarira mambo wako? Uri kwapi mukhondo no cijuvi ca Sauri?’ Sauri wakazvizwa kuti rainga izwi ra Dhavhidhi, zve wakati: ‘Iwewe waizokwanisa kundiuraya, asi auzivi. Ndinoziva kuti iwewe ucazova mambo anotevera wo Iziraeri.’ Sauri wakahwirira ku muzi kwake. Asi, asipi vese vo pa muzi pa Sauri vaizonda Dhavhidhi.