OSHIILONGOMWA 41
David naSaul
David sho a dhipaga Goliat, omukwaniilwa Saul okwe mu ningi omutonateli gwaakwiita ye. David okwa li a tseyika nawa, molwaashono okwa sindana omalugodhi ogendji. David sho a galukile kegumbo okuza kiita, aakiintu oya zi miilando taya dhana yo tayi imbi taya ti: ‘Saul okwa dhipaga eyuvi, ihe David omayuvi omulongo.’ Saul okwa li a sile David efupa nokwa li a hala oku mu dhipaga.
David okwa li ha hiki nawa okaharpa. Esiku limwe manga David a li ta hikile omukwaniilwa Saul okaharpa, Saul okwe mu umpile negonga. David okwe li yanda, e tali ka ndjikama mekuma. Konima yaashono Saul okwa kambadhala iikando oyindji a dhipage David. Lwahugunina, David okwa fadhuka po e ta ka holama mombuga.
Saul okwa kutha aakwiita 3 000 e taya yi ya ka konge David. Saul okwa yi mekololo moka mwa li mwa holama David naantu ye. Aakwiita yaDavid oye mu nongonene ya ti: ‘Ndjino ompito yoye ombwanawa yokudhipaga Saul.’ David okwa nyoontoka ta yi kuSaul e ta tete okalapi konguwo ye. Saul ine shi dhimbulula. Konima yaashono, David oku uvu nayi sho a mono kutya ina simaneka omukwaniilwa ngoka a hogololwa kuJehova. Ina pitika nando aantu ye ya ponokele Saul. David okwi igidha nokuli Saul ta ti kutya okwa li ta vulu oku mu dhipaga ngele ando okwa li a hala. Mbela Saul okwa li a lundulula omadhiladhilo kombinga yokudhipaga David?
Hasho nando. Saul okwa tsikile okukonga David. Ongulohi yimwe David nomwanagona Abisai oyi iyakele montanda yaSaul. Oya adha Abner, ondjayi yiita yaSaul ya kotha. Abisai okwa ti kuDavid: ‘Ndjino ompito yetu, andiya ndi mu dhipage.’ David okwe mu lombwele a ti: ‘Jehova oye mwene ta ka dhipaga Saul. Natu kuthe po owala egonga lye nombago ye yomeya tu ye.’
David okwa londo kondundu yi li popepi nontanda yaSaul. Okwi igidha a ti: ‘Abner, oshike ano inoo gamena omukwaniilwa gweni? Egonga nombago yaSaul oyi li peni?’ Saul okwa dhimbulula ewi lyaDavid e ta ti: ‘Owa li to vulu okudhipaga ndje, ihe ino shi ninga. Ondi shi kutya ongoye to ka ninga omukwaniilwa gwAaisraeli.’ Saul okwa shuna kaandjawo. Haantu ayehe mezimo lyaSaul ya li ye tonde David.
“Ne yene kombinga yeni ningeni ashihe tamu shi vulu, mu kale nombili naantu ayehe. Aaholike, inamu shunithila omuntu uuwinayi, ihe etheni, ondjahi yaKalunga yi shi ninge.” — Aaroma 12:18, 19
Opu na ishewe uuyelele mbuka
OMBIIMBELI OYI NA ETUMWALAKA LINI?
Aaisraeli oya li ya pula ya pewe omukwaniilwa
Jehova okwa hogolola Saul a ninge omukwaniilwa sho Aaisraeli ya pula. Omolwashike Jehova a ningi David omukwaniilwa pehala lyaSaul?
