Ka morago ga gore Dafida a bolaye Goliata, Kgoši Saulo o ile a dira gore Dafida e be molaodi wa mašole a gagwe. Dafida o ile a fenya ditšhaba tše dintši, gomme a tuma kudu. Ka mehla ge Dafida a boa ntweng, basadi ba be ba etla gomme ba opela le go bina ba re: ‘Saulo o bolaile batho ba dikete, Dafida yena o bolaile ba dikete tše masome!’ Saulo o ile a jela Dafida mona, gomme a thoma go nyaka go mmolaya.

Dafida o be a kgona go letša harepa. Bjale ka letšatši le lengwe ge a be a bapalela kgoši Saulo harepa, Saulo o ile a mo foša ka lerumo. Dafida o ile a phema, gomme lerumo leo la hlaba leboto. Go tloga letšatšing leo, Saulo o ile a leka gantši go bolaya Dafida. Mafelelong, Dafida o ile a tšhaba gomme a yo utama lešokeng.

Saulo o ile a tšea mašole a gagwe a 3 000 gomme ba yo tsoma Dafida. Go ile gwa direga gore Saulo a tsene ka leweng leo Dafida le banna ba gagwe ba bego ba utame ka go lona.  Banna ba Dafida ba ile ba mo sebela ba re: ‘Se ke sebaka sa gore o bolaye Saulo.’ Dafida a khukhuna a ya go Saulo gomme a ripa seaparo sa gagwe. Saulo a se kwe selo. Ka morago ga moo, Dafida a tšhošwa ke gore ga se a hlompha motho yo Jehofa a mo kgethilego gore e be kgoši. Eupša a se dumelele banna ba gagwe gore ba bolaye Saulo. Dafida a goeletša Saulo, gomme a mmotša gore nkabe a mmolaile ge a be a nyaka. Na Saulo o ile a thoma go rata Dafida?

Aowa. Saulo o ile a tšwela pele a nyaka go bolaya Dafida. Bošegong bjo bongwe, Dafida le motlogolo wa gagwe e lego Abishai, ba ile ba khukhuna ba ya moo Saulo le mašole a gagwe ba bego ba robetše gona. Gaešita le Abenere, yo a bego a leta kgoši Saulo, o be a robetše. Abishai a botša Dafida a re: ‘Se ke sebaka sa gore re bolaye Saulo! Ntumelele ke mmolaye.’ Dafida a re: ‘O se ke wa mmolaya. Jehofa o tla bona gore o dira eng ka yena. Rena a re tšee lerumo la gagwe le legapana la gagwe la meetse re sepele.’

Ke moka Dafida a ema thabeng ya kgauswi le moo Saulo le mašole a gagwe ba bego ba robetše gona. A goeletša a re: ‘Abenere, ke ka baka la eng o se wa šireletša kgoši Saulo? Lerumo la Saulo le mokotlana wa gagwe wa meetse di kae?’ Saulo o ile a kwa gore lentšu leo ke la Dafida gomme a re: ‘Ge nkabe o nyaka go mpolaya, nkabe o mpolaile kgale. Bjale gona ke a tseba gore o tlo ba kgoši ya Isiraele ka morago ga ka.’ Ke moka Saulo a boela gae. Eupša ga se batho ka moka ba lapeng la Saulo bao ba bego ba hloile Dafida.