David éí Goláíyath jiisxı̨́ı̨́dóó bikʼijįʼ, Naatʼáanii Saul bisiláo jooʼishgo áhoolaa. David anaaʼí yikʼeh nídídleehgo bééhoʼdílzin. Anaaʼ hólǫ́ǫ́dę́ę́ʼ níjídáahgo, sáanii daʼalzhishgo dahataał: ‘Saul éí damíilgo neistseed, índa David éí neeznáá damííl biláahgo neistseed!ʼ. Áko Saul éí David yoołchʼı̨́įdgo hodiyoołhéełgo yihodeezʼą́.

David éí harp yee naanéego yiyiichįįh. Naatʼáanii Saul łah bá nijinéego tsiidétáán kʼasdą́ą́ʼ yee hwiisxı̨́. Tsiidétáán kin baa ííjil. Saul éí díkwíidi shı̨́ı̨́ kʼasdą́ą́ʼ hwiisxı̨́. Áko David éí honoojítahgóó yóóʼajoolwodgo Saul bitsʼąą nazhnitʼin ńtʼééʼ.

Saul éí bisiláo 3,000 yiltʼéego David hadeintá. David dóó diné yił naakaiígíí tséʼáán góneʼ nidanitʼin. Saul éí tʼáá éí  tséʼáán góneʼ yah ííyá. David yił naakaiígíí David ádeiłní: ‘Saul diyííłhéełgo ná ashjaʼ hoodzaa.’ David éí Saul biʼéétsoh yidíígizh. Saul éí tʼáadoo yaa ákoniizı̨́įʼ da. David éí naatʼáanii anoint ályaaígíí doo hoł nilı̨́į da, ei baa hániʼgo baa tsízdeezkééz. Áko Saul tʼáadoo atídajiilaa da. David éí Saul áyidííniid: ‘Azhą́ nidiyeeshxéeł ndi tʼáadoo niyéłhı̨́į da.’ Daʼ ákoósh Saul éí David łah átʼéego yaa tsíńdookos?

Ndagaʼ. Saul tʼahdii hákantá. David dóó bidáʼí Abísheiyai éí Saul ninínáníjįʼ yił yah anootʼı̨́ı̨́ʼ. Ábner éí Saul baa áhojilyą́, ndi ajiłhosh. Áko Abísheiyai áháłní: ‘Kʼad nihá ashjaʼ hoodzaa! Diyeeshxééł yaʼ?’ David áháłní: ‘Jiihóvah tʼáá bí Saul yaa nídóotʼįįł. Bitsiidétáán dóó bitóshjeeh tʼéiyá nídidiiʼníł.’

David dziłghą́ą́ʼ hajiyáago Saul dah yinéłígíí jinéłʼı̨́, Ábner bichʼįʼ hazhdoolghaazhgo ájíní: ‘Haʼátʼíísh biniinaa ninaatʼáanii doo hazhóʼó baa áhólyą́ą da? Háájíshąʼ bitsiidétáán dóó bitóshjeeh?ʼ Saul éí David biinééʼ yééhoosįįdgo ání: ‘Shidiyííłhééł ńtʼééʼ tʼáadoo íinidzaa da. Naatʼáanii dííleełgo shił bééhózin.ʼ Saul bighanídóó doo tʼáá ałtso David deijoołáa da.