Daudi ku yaaherize kwita Goliasi, Omugabe Saulo akamuhindura mukuru w’amahe ge. Daudi akasingura engamba nyingi, kandi yaamanywa munonga. Daudi ku yaabaire aruga omu rugamba, abakazi bakaba baija kumubugana barikuzina kandi barikweshongora nibagira bati: ‘Saulo aitsire enkumi, kandi Daudi yaita obukumi!’ Saulo akagirira Daudi eihari kandi yaayenda kumwita.

Daudi akaba naamanya gye kuteera enanga. Eizooba rimwe Daudi akaba naateerera Saulo enanga, Saulo yaamurekyera eicumu kumucumita. Kwonka Daudi akarihunga tiryamucumita, ryacumita ekisiika. Bwanyima y’ekyo, Saulo akagyezaho emirundi mingi kwita Daudi. Ekyarugiremu, akairuka yaaza kweshereka omu ihamba.

Saulo akatwara eihe ry’abashaija 3,000 baaza kusherura Daudi. Akataaha omu  nyanga ei Daudi n’abashaija be baabaire beesherekiremu. Abashaija ba Daudi bakahwihwitsa nibamugira bati: ‘Aka niko kagisha kaawe k’okwita Saulo.’ Daudi akagyenda mporampora yaahika ahari Saulo yaashara aha mukugiro gw’omunagiro gwe. Saulo tarakimanyire. Bwanyima, Daudi akeehurira kubi munonga ahabw’okutaha ekitiinisa omugabe wa Yehova oshukirweho amajuta. Taraikiriize abashaija be kukora kubi Saulo. Nangwa akeeta Saulo arikumugira ngu yaaba naabaasa kumwita. Mbwenu shi Saulo akahindura emiteekateekyere ye ahari Daudi?

Ngaaha. Saulo akaguma naahiiga Daudi. Eizooba rimwe omu kiro, Daudi na mwihwa we Abishai bakagyenda nibashooba baaza omu nkambi ya Saulo. Abuneeri omurinzi wa Saulo, nawe akaba agwejegyeire. Abishai akagira ati: ‘Aka n’akagisha kaitu! Reka mwite.’ Daudi akamugarukamu ati: ‘Yehova niwe araamufubire. Ka tutware eicumu rye n’orunywero rwe rw’amaizi.’

Daudi akambuka seeri yaayemerera aha mutwe gw’ekibungo ekyabaire kiri haihi n’ahu yaabaire naabaasa kureeba omu nkambi ya Saulo. Daudi akeeta n’eiraka rihango naagira ati: ‘Abuneeri, ahabw’enki otarinzire omugabe waawe? Orunywero rwa Saulo n’eicumu rye birahi?’ Saulo akamanya eiraka rya Daudi, reero yaamugira ati: ‘Okaabaire waanyitsire, kwonka tokikozire. Nimmanya ngu niiwe oraabe omugabe wa Israeli.’ Saulo yaagaruka omu ka owe. Kwonka ti boona ab’omuka ya Saulo ngu bakaba nibanga Daudi.