Mɔɔ Devidi hunle Golayate la, Belemgbunli Sɔɔlo vale ye yɛle sogyama kpanyinli. DevidI lile konim dɔɔnwo yemɔti ɔliele duma. Saa ɔkɔ konle ɔba a, mraalɛ ne mɔ to edwɛne si agole kɔyia ye adenle na bɛto edwɛne kɛ: “Sɔɔlo ɛhu apenle apenle, na Devidi ɛhu apenle apenle bulu.” Mɔɔ Sɔɔlo dele ɛhye la, ɔ nye bolole Devidi yemɔti ɔyɛle kɛ ɔku ye.

Ɛnee Devidi ze sanwule bɔ kpalɛ. Kenle ko mɔɔ Devidi ɛlɛbɔ sanwule amaa Belemgbunli Sɔɔlo la, ɔdole ye atwɛ ne kɛ ɔfa yeawɔ Devidi. Noko Devidi hanle ɔ nwo aze na atwɛ ne hɔwɔle bane ne anu. Ɔvi mekɛ zɔhane, Sɔɔlo bɔle mɔdenle fane dɔɔnwo kɛ ɔku Devidi. Yemɔti Devidi nriandile hɔveale ɛsɛlɛ ne azo lɔ.

Sɔɔlo nee ye sogyama 3,000 hɔle kɛ bɛkakpondɛ Devidi. Ɛnee ɔnze ye yemɔti  ɔhɔveale bolɛ bɔne bie mɔɔ Devidi nee ye menli ne vea nu la anu. Devidi menli ne zele ye kɛ: ‘Ɛnɛ le mekɛ mɔɔ ɔwɔ kɛ ɛku Sɔɔlo a.’ Yemɔti Devidi yɛle nyaa nyaa hɔpɛle Sɔɔlo tɛladeɛ aguzo ne mɔɔ ɔwula la sinli noko Sɔɔlo annwu ye. Akee Devidi adwenle gyegyele ye kɛ yeambu ahenle mɔɔ Gyihova ɛkpokpa ye la. Yeammaa ye menli ne anyɛ Sɔɔlo ɛhwee. Akee ɔgyinlanle ahane ɔvɛlɛle Sɔɔlo na ɔzele ye kɛ anrɛɛ ɔbahola yeahu ye, noko yeanyɛ zɔ. Asoo ɛhye maanle Sɔɔlo hakyile ye adwenle ɔ?

Kyɛkyɛ, Sɔɔlo hɔle zo kpondɛle Devidi kɛ ɔku ye. Kenle ko nɔɔzo, Devidi nee ye awozoa Abehyae yɛle nyaa nyaa hɔle Sɔɔlo azokoɛleɛ ne. Ɛnee Abenɛɛ mɔɔ sinza Sɔɔlo la bɔbɔ ɛlafe. Yemɔti Abehyae hanle kɛ: ‘Ɛnɛ yɛ sa ɛha ye! Maa mengu ye.’ Devidi buale kɛ: ‘Gyihova ɔdaye ɔ nee Sɔɔlo bali. Maa yɛva ye atwɛ ne nee ye nzule dwora ne yɛhɔ.’

Devidi hɔvole boka bie, ɛleka mɔɔ ɔgyi a ɔnwu Sɔɔlo azokoɛleɛ ne la. Ɔdeanle nu kɛ: ‘Abenɛɛ, duzu ati a wɔangola wɔanzinza wɔ belemgbunli ne a? Sɔɔlo dwora ne nee ye atwɛ ne wɔ ni?’ Sɔɔlo dele Devidi ane yemɔti ɔhanle kɛ: ‘Anrɛɛ ɛkola ɛku me noko wɔanyɛ zɔ. Meze kɛ Gyihova ɛkpokpa wɔ kɛ Yizilayɛ belemgbunli.’ Akee Sɔɔlo ziale hɔle sua nu. Noko tɛ Sɔɔlo abusua ne anu amra amuala a kpɔle Devidi a.