Daawit Goliyaadiin erga ajjeesee booda, Saaʼol Mootichi ajajaa raayyaa isaa isa godhate. Daawit waraana hedduu irratti waan injifateef, nama baayʼee beekamaa taʼe. Daawit yommuu waraana irraa gara manaatti deebiʼu dubartoonni shubbisaa fi sirbaa, ‘Saaʼol kumaatama ajjeese, Daawit garuu kuma kumaatama ajjeese!’ jedhu turan. Saaʼol, Daawititti waan hinaafeef isa ajjeesuu barbaade.

Daawit akka gaariitti baganaa taphachuu dandaʼa ture. Gaaf tokko utuu Daawit Saaʼoliif baganaa taphachaa jiruu, mootichi eeboo isaa itti darbate. Daawit hamma xinnoof waan jalaa miliqeef, eeboon sun keenyan waraane. Sana booda Saaʼol, Daawitiin ajjeesuuf yeroo hedduudhaaf yaalii godhee ture. Dhuma irrattis, Daawit dhokachuuf gara lafa onaatti baqate.

Saaʼolis loltoota 3,000 fudhatee, barbaadee isa qabuu deeme. Achiis akkuma tasaa holqa dhagaa Daawitii fi namoonni  isaa keessa dhokatanitti seene. Namoonni Daawit, ‘Yeroon Saaʼoliin ajjeesuu itti dandeessu amma’ jedhanii asaasanii dubbatan. Daawit suuta jedhee Saaʼol bira gaʼuudhaan fiixee uffata mootichaa kute. Saaʼol garuu kana hin hubanne. Sana booda, Daawit mootii Yihowaan dibeef kabaja utuu hin argisiisin hafuu isaatti sammuun isaa isa ceephaʼe. Kanaaf, namoonni isaa Saaʼoliin akka ajjeesan isaaniif hin heyyamne. Achiis sagalee guddaadhaan Saaʼoliin waamee, isa ajjeesuuf carraa argatee akka ture itti hime. Haalli kun ilaalcha Saaʼol Daawitiif qabu jijjiireeraa?

Lakki. Saaʼol Daawitiin barbaaduu isaa ittuma fufeera. Gaaf tokko halkan, Daawitii fi Abiishaayi ilmi obboleettii isaa bakka Saaʼol buufate keessa dhokatanii seenan. Yeroo kanatti Abneer inni eegduu Saaʼol taʼe illee rafee ture. Abiishaayi, ‘Kun carraa gaarii dha! Isan ajjeesa’ jedhe. Daawit garuu deebisee, ‘Saaʼol irratti tarkaanfii kan fudhatu Yihowaa dha. Eeboo isaa fi qodaa bishaanii isaa qofa fudhannee haa deemnu’ jedhe.

Sana booda Daawit tulluu naannoo buufata Saaʼol gubbaa jiru tokkotti ol baʼe. Achiis sagalee isaa guddisee, ‘Abneer, maaliif mootii kee eeguu dhiiste? Qodaan bishaanii fi eeboon Saaʼol eessa jira?’ jedhe. Saaʼolis, sagalee Daawit taʼuu isaa beekee, ‘Ati na ajjeesuu dandeessa turte, garuu kana hin goone. Ati mootii Israaʼel isa itti aanu akka taatu beeka’ jedhe. Kana booda, Saaʼol gara mana mootummaa isaatti deebiʼe. Haa taʼu malee, Daawitiin kan jibbu maatii Saaʼol hunda hin turre.