David Goliatta wañuchisqanmanta qhepaman, rey Saulqa payta soldadosta kamachinanpaj churarqa. Davidqa may rejsisqa karqa ashkha maqanakuspi atipasqanrayku. Maqanakusqanmanta kutimojtintaj warmisqa takispa, tususpa taripamoj kanku, nejtaj kanku: “Saulqa waranqa runasta wañucherqa, Davidtaj chunka waranqata”, nispa. Saultaj envidiakuspa “Davidta wañuchisaj” nerqa.

Davidqa arpata sumajta tocaj. Uj diataj, arpata tocapushajtin Saulqa tʼojsina lanzanwan payman choqarqa. Davidtaj kʼumuykorqa, lanzataj perqaman clavakorqa. Chaymantapacha Saulqa ashkha kutispi Davidta wañuchiyta munarqa. Davidtaj chʼin lugarman pakakoj ayqekorqa.

Saultaj 3.000 soldadoswan Davidta maskʼamorqa. Maskʼashaspataj uj jatun qaqa juskʼuman yaykorqa, chaypitaj  Davidwan soldadosninwan kasharqanku. Soldadosqa calmitallawan Davidta nerqanku: “Saulta wañuchiy”, nispa. Davidtaj Saulman qayllaykuspa, mana reparanallanta ropanpa kantunta kʼuturparerqa. Chayta ruwasqanraykutaj sonqon mayta nanarqa. Chantapis Davidqa mana saqerqachu soldadosnin Saulta wañuchinankuta. Saúl qaqa juskʼumanta llojsipojtintaj, nerqa: “Wañuchiykiman karqa”, nispa. Saultajrí payta qhatiykachallarqapuni.

Uj chʼisi, Davidqa sobrinon Abisaiwan Saúl puñusharqa chayman pakayllamanta yaykorqa. Saulta qhawaj soldado Abnerqa puñurpasqa. Abisaitaj nerqa: “Kunan atikushajtin Saulta wañuchejta saqeway”, nispa. Davidtaj nerqa: “Jehová Diosman chayta saqepuna. Tʼojsina lanzanta, yaku yuruntawan oqhariy, chantá ripuna”, nispa.

Chantá Davidqa chay qayllapi kaj orqomanta qhaparimorqa: “Abner, ¿imaraykutaj mana qhawankichu reyniykitari? ¿Maypitaj kashan lanzanwan, yakunwan?”, nispa. Saultaj Davidpa parlasqanta rejsirparerqa, qhaparerqataj: “Wañuchiwankiman karqa. Reparani qan Israelpi qhepan kaj rey kanaykita”, nispa. Chantá Saulqa kamachina wasiman kutiporqa. Davidtaqa mana Saulpa tukuy familiaresninchu chejnikorqanku.