Goliatta huañuchishca qꞌuipaca Saulca paipaj soldadocunata mandachunmi Davidta churarca. Davidca achca macanacuicunapi mishashcamantami rijsishca runa tucurca. Cada macanacuimanta tigramujpimi huarmicunaca Saulca 1.000 contracunatami huañuchishca, Davidca 10.000 contracunatami huañuchishca nishpa, cantashpa bailashpa tupajcuna carca. Chashna nijpica Saulca Davidta achcata envidiai callarishpami huañuchisha nirca.

Davidca arpataca allimi tocaj carca. Shuj punllaca Saúl uyachunmi arpata tocacurca. Chaipimi Saulca shuj lanzata Davidpajman shitarca. David utca cumurijpimi chai lanzaca pata quinripi clavarirca. Chai qꞌuipapish achca cutinmi Saulca Davidta huañuchisha nirca. Chaimantami Davidca shitashca pambacunapi miticunaman rirca.

Chaimi Saulca paipaj 3.000 soldadocunandij Davidta mashcanaman rircacuna.  Mashcacushpaca David paipaj runacunahuan miticushca jutcullamantajmi Saulca yaicurca. Chaipimi Davidhuan caj runacunaca allilla paitaca, ‘cunanmi Saulta huañuchi tucungui’ nircacuna. Davidca Saulpajman cꞌuchuyashpaca pi mana ricucujpimi paipaj jahua churana ashata pꞌitirca. Pero qꞌuipaca Davidca Jehová Dios agllashca mandajta mana respetashcamantami achcata llaquirirca. Chaimantami paipaj runacuna Saulta llaquichichunca mana saquirca. Saúl chai jutcumanta llujshijpica Davidca sinchita caparishpami, ‘cantaca huañuchi tucushpapish mana huañuchircanichu’ nirca. ¿Saulca Davidta llaquichisha nishpa catishcachu canga?

Ari. Saulca ashtahuanmi Davidta llaquichisha nishpa catirca. Shuj tutami Davidca paipaj sobrino Abisaindij pi mana ricucujpi Saulpaj carpa huasicunaman yaicurcacuna. Chaipimi Saulta cuidaj Abnerpish dormicurca. Chaita ricushpami Abisaica Davidtaca, ‘cunanmari Saultaca huañuchi tucunchij. Huañuchichun saqui’ nirca. Pero Davidca, ‘Jehovami paitaca ricunga. Paipaj lanzata, paipaj yacu puñutapish apashpa jaculla’ nircami.

Qꞌuipaca Saulpaj carpa huasicuna cꞌuchulla urcumanmi Davidca huichiyarca. Chai jahuamantami paica, ‘¡Abner! ¿Cambaj mandajtaca ima nishpataj mana cuidarcangui? ¿Paipaj lanzapish yacuta apana puñupish maipitaj?’ nishpa caparirca. Saulca David caparicushcata uyashpami, ‘ñucata huañuchi tucushpapish mana huañuchishcanguichu. Can israelitacunata catij mandaj cashcatami cunanca yachani’ nirca. Qꞌuipaca Saulca paipaj huasimanmi tigrarca. Pero paipaj huaquin familiacunaca Davidta cꞌuyarcami.