Goliatta David wañurachiptinmi Saulqa tropankunapa jefen kananpaq akllarurqa. Davidqa allin peleaq kasqanraykum riqsisqa karqa. Huk kutipim peleamusqanmanta kutiramuptin warmikuna takispa chaynataq tususpa kaynata nirqaku: “Saulmi achka enemigonkunata wañurachimun. Davidñataqmi aswan achka-achkataraq”, nispa. Chayta uyariruspanmi Saulqa Davidta chiqnispan wañurachiyta munarqa.

Huk punchawmi arpata David tocapuchkaptin Saulqa lanzawan chuqarurqa. Ichaqa kurkukuykuptinmi pirqaman lanza chayarurqa. Chaymantapacham Saulqa tukuyta ruwarqa Davidta wañuchinanpaq. Davidñataqmi ayqikuspan chunniqpi pakakurqa.

Saulñataqmi 3.000 soldadonkunawan Davidta qatikacharqa. Huk kutipim mana yachastin Davidpa pakakusqan machayman yaykururqaku. Chaymi Davidta runankuna kaynata nirqaku: “Kunanyá  Saulta wañurachiy”, nispa. Davidñataqmi Saulman upallalla asuykuruspan pachanpa puntanta kuchururqa. Chayna ruwasqanwanqa manam Diospa akllasqan kamachiqta respetarqachu, chaymi Davidqa anchata hukmanyarurqa. Hinaspapas runankunatam nirqa Saulta mana wañuchinankupaq. Machaymanta Saul lluqsiramuptinmi Davidqa qaparispan kaynata nirqa: “Munaspayqa wañurachikimanmi karqa”, nispa. Chaywanpas Davidtaqa hinallam wañuchiyta munarqa.

Huk tutam Davidqa sobrinon Abisaiwan upallalla Saulman asuykururqaku. Saulta qawaq Abnerpas puñurusqam, chaymi Abisaiqa Davidta nirqa: “¡Saqiykuway Saulta kunan wañurachinaypaq!”, nispa. Ichaqa Davidmi nirqa: “Ama, Jehova Diospa makinpiña saqiykusun. Ñuqanchikqa lanzantawan yakuyuq aysakullanta aparikusun”, nispa.

Chaymantam Davidqa urquman qispiruspan qaparirqa: “¡Abner! ¿Imanasqam kamachiq Saulta mana qawarqankichu? ¿Maytaq Saulpa lanzanwan yaku aysakunqa?”, nispa. Saulñataqmi Davidta nirqa: “Wañurachiwankimanmi karqa, ichaqa manam chaytaqa munarqankichu. Yachaniñam Israel runakunapa kamachiqnin kanaykimanta”, nispa. Hinaspam Saulqa wasinman kutikurqa. Davidta Saul mana kuyaptinpas Saulpa wakin ayllunkunaqa kuyarqakum.