Goliat-ta wañuchisqan qhepamanmi Davidqa Saulpa ejercitonta umalliran. Davidqa askha guerrakunatan ganaran chaymi allin reqsisqa kapuran. Maqanakuymanta sapa kutimuqtinmi warmikunaqa takispa tususpa niranku: “Saulqa waranqanpi runakunata wañuchiran, Davidmi ichaqa chunka waranqanpi wañuchiran”, nispa. Chaymi Saulqa Davidmanta envidiakuspa wañuchiyta munaran.

Davidqa allintan arpa tocayta yacharan. Juj p’unchaymi Saulpaq arpata tocashaqtin Saulqa lanzanwan chanqaran. Davidmi ichaqa k’umururan jinan lanzaqa perqapi ch’antikuran. Saulqa askha kutipin Davidta wañuchiyta munaran. Chaymi Davidqa ayqekuran ch’inneq ladoman.

Jinan Saulqa Davidta qatiparan 3.000 soldadokunawan. Chay kutipin Saulqa  Davidpa pakakusqan t’oqoman jaykuran. Chaymi soldadonkuna Davidta niranku: “Wañurachiy”, nispa. Davidtaq sumaqllata qayllaykuspa Saulpa p’achanmanta juj parteta mana reparachikuspalla llik’iran. Davidpa sonqonmi ichaqa ñit’iran, jinan soldadonkunata kamachiran Saulta ama wañuchinankupaq. Saúl ripushaqtintaq Davidqa niran: “¡Makiypin kasharanki, ichaqa manan wañuchiraykichu!”, nispa. Chay qhepaman, ¿cambiaranchu Saúl?

Manan, Davidtan qatikachashallaran wañuchinanpaq. Juj tutan Davidqa sobrinon Abisaiwan Saulpa karpakusqanman riran, manan pipas repararanchu. Saulta cuidaq Abnerpas misk’itan puñusharan, jinan Abisaiqa Davidta niran: “Saulta wañurachisaq”, nispa. Davidmi ichaqa niran: “Diosmi paymanta encargakunqa. Lanzanta jarrantawan aswanpas aparikusun”, nispa.

Jinan Davidqa orqoman wichaspa alto kunkawan niran: “¡Abner! ¿Imaraykun reyniykita mana cuidarankichu? ¿Maytaq jarranpas lanzanpas?”, nispa. Saulqa repararanmi David kasqanta, jinan niran: “Wañuchiwankimanmi karan, ichaqa manan chaytachu ruwaranki. Kunanqa yachanin rey kanaykita”, nispa. Jinan Saulqa wasinman kutipuran. Saulpa wakin familianqa munakuranmi Davidta.