Goliat runata huañuchishca jipaca rey Saulca Davidtami paipa soldadocunata mandachun churarca. Davidca ashtaca macanajuicunata mishaimandami rijsishcapacha tucurca. Macanajuipi mishashpa soldadocunandi huasiman tigrajpica israelita huarmicunaca candashpa, danzashpami cashna nin carca: ‘Saulca, huaranga runacunatami huañuchishca. Davidca, chunga huaranga runacunatami huañuchishca’ nishpa. Chaimandami Saulca, Davidta ninanda envidiashpa huañuchingapaj munarca.

Davidca arpata alipachami tocanata yachan carca. Shuj punllaca Davidca Saúl uyachunmi arpata tocajurca. Chaipimi Saulca “Davidpajman lanzata shitarca”. Chaita ricushpa David uchalla urai cumurijpimi chai lanzaca pircapi clavarirca. Chai jipaca Saulca ashtaca viajemi Davidta huañuchingapaj munarca. Chaimi Davidca chaquishca pambacunapi pacajungapaj rirca.

Shina rijpimi Saulca 3 mil soldadocunahuan Davidta mascangapaj rirca. Shinami na yashcapi Saulca, David paipa runacunandi pacajushca tianajuj utujumanllata yaicurca. Chaipimi Davidpa runacunaca upallaguta  cashna nirca: Cunanda Saulta huañuchishpa saqui nishpa. Shinapash Davidca Saulpaman quimirishpa jahualla churajuna pundata cuchurca. Chai jipaca Davidca, Jehová Dios agllashca reyta na respetashcamandami “paipaj shungupi ninanda” llaquirirca. Chaimandami paita cumbaj runacuna Saulta llaquichichunga na saquirca. Chaimi Saúl chai utujumanda llujshijpica Davidca cashna nishpa caparirca: Canba causai ñuca maquipi cajpipash na huañuchircanichu nishpa. Imatata yuyangui ¿Saulca paita na huañuchishcamandaca Davidta alichu tratagrijurca?

Na, na ali tratarcachu. Saulca, Davidta huañuchingapapachami munarca. Shuj tutaca Davidca, paipa sobrino Abisái runahuanmi pipash na sintijta Saulpa carpa huasicunaman yaicurca. Saulta cuidaj Abner runapash puñujurcami. Chaipimi Abisái runaca Davidta cashna nirca: ‘Cunanmi Taita Diosca, canda fiñajtaca canba maquipi churashca. Cunanga, ñucallata paita huañuchichun saquihuai’ nishpa. Shinapash Davidca nircami: Paihuan imata ruranataca Jehová Dios ricuchun saquilla, chaipa randica “paipaj uma sauna ladopi shayajuj lanzata, yacuta japina jarratalla japishpa jaculla” nishpa.

Davidca chai ladollapi shuj urcuman vitsiashpami Saulpa carpa huasicunata ricurca. Chai urcumandami Davidca cashna caparijurca: Abner “¿imashpata jatun mandaj cambaj amotaca, na cuidarcangui?” “¿Jatun mandajpaj uma sauna ladopi tiajushca lanzapash, yacuta japina jarrapash maipitayari?” nishpa. Chaimi Saulca, David parlashcata rijsishpa cashna nirca: Ñucapa causai canba maquipi cajpipash ñucataca na huañuchircanguichu. Cunanmi cuenta japini, canmi ñucapa jipaca Israel llactataca mandagringui nishpa. Chai jipami Saulca paipa huasiman tigrarca. Shinapash rey Saulpa huaquin familiacunaca Davidtaca juyanmi carca.