Palo odova so o David mudardža e Golijate, o kralj Saul čhivdža lje te vodini e vojska. O David pobedindža ko but mariba hem ulo but pendžarutno. Uvek ked irindža pe ando disavo maribe, o džuvlja čheldže hem džilabdže: „O Saul mudardža hiljada dušmanja, a o David deš hiljada dušmanja.“ Odoljese o Saul ulo ljubomorno upro David hem manglja te mudari lje.

O David but šukar bašaldža i harfa. Jekh dive, dži bašaldža e Saulese, o Saul fordindža poklo koplje upro ljeste te mudari lje. O David sigate cidindža pe hem o koplje khuvdža ko zido. Palo odova, o Saul manglja but putija te mudari lje. Odoljese, o David našlja hem garavdža pe ki pustinja.

O Saul ljelja 3 000 vojnikija hem dželo te rodel e Davide. Ov khuvdža ki pećina kuri o David garavdža pe peklje manušencar. Tegani, e Davidese manuša phendže ljese:  „Ače, akana šaj te mudare lje.“ O David pohari dželo uzo Saul hem čhindža jekh kotor ando oljeso ogrtač. Ama, o Saul ništa na osetindža. Palo odova, e Davidese hine pharo, sose adžahar mothovdža so na poštujini e kraljo kas birindža o Jehova. Ov na mukhlja pe manušen te napadinen e Saule. Ked ikljilo o Saul andi pećina o David vičindža hem phendža ljese so šaj hine te mudari lje, ama na čerdža odova. Da li o Saul odustajindža ando odova te mudari e Davide?

Na. O Saul pana rodindža lje. Jekh rat, o David hem oljese phenjako čhavo o Avisaj, čorjalje alje ko e Sauleso logor. Othe sarine suče, čak hem e Sauleso čuvari, o Avenir. O Avisaj phendža: „Akana šaj te mudara lje. Mukh man te čerav odova!“ Ama, o David odgovorindža: „O Jehova ka irini e Saulese. Hajde te la ljestar samo o koplje hem o khoro hem te dža.“

Ked o David ukljindža ki planina kotar šajindža te dikhel pe o logor, vičindža: „Avenir, sose na arakheja e kraljo? Kaj tano oljeso koplje hem o khoro?“ O Saul pendžardža e Davideso glaso hem phendža: „Šaj hine te mudare man, ama na čerdžan odova. Džanava so palo mande tu ka ove kraljo ko Izrael.“ Palo odova, o Saul irindža pe ki piklji palata. Ama, na mrzindže e Davide sarine andi e Saulesi porodica.