Mudamala Dhavidhi kupha Goliati, Mambo Sauli amuikha ninga nkulu wa anyankhondo ace. Dhavidhi awina nkhondo zizinji, pontho iye adzakhala wa mbiri kakamwe. M’maulendo onsene akhabuluka Dhavidhi ku nkhondo, akazi akhabvina mbaimba tenepa: ‘Sauli apha anthu pikwi, Dhavidhi apha makhumi a pikwi.’ Sauli adzakhala na ntcanje na Dhavidhi, pontho asaka kumupha.

Dhavidhi akhadziwa mwadidi kuliza nyakatangale. Ntsiku inango, pikhaimba iye nyakatangale kuna Sauli, mambo amponyera dipa toera kumulasa. Dhavidhi andzwenga, dipa mbilasa pa paredhi. Buluka penepo, Sauli ayesera maulendo mazinji kupha Dhavidhi. Mbwenye Dhavidhi athawa mbaenda kabisala n’thando.

Sauli akwata anyankhondo 3.000 mbaenda kasaka Dhavidhi. Sauli apita mu mphako ibodzi ene mukhadabisala Dhavidhi  na amuna ace. Amuna a Dhavidhi alonga mwaciwerewere: ‘Uyu ndi mwai wako toera kupha Sauli.’ Dhavidhi afika cifupi mbagwanda phindi ya nguwo ya Sauli. Sauli nee adzindikira cinthu. Buluka penepo, Dhavidhi apasika mulando thangwi yakukhonda pangiza cilemedzo kuna mambo wakudzodzwa na Yahova. Iye nee atawirisa amuna ace kupha Sauli. Iye adzacemera Sauli, mbalonga: ‘Ndikhali na mwai toera kukupha, mbwenye nee ndacita pyenepi.’ Kodi Sauli acinja manyerezero ace thangwi ya Dhavidhi?

Nkhabe. Sauli apitiriza kusaka Dhavidhi. Ntsiku inango namasiku Dhavidhi na ndzukulu wace, Abhisai, aenda pakati pa misasa. Onsene akhagona kuphatanizambo Abnere, nyakutsidzikiza wa mambo Sauli. Abhisai alonga: ‘Uyu ndi mwai wathu! Ndisiyeni ndimuphe!’ Dhavidhi atawira: ‘Yahova anadzantcunyusa. Basi ene tende tikwate dipa yace na mulinga wace wa madzi tiende.’

Dhavidhi akwira phiri ikhali dhuzi na misasa ya anyankhondo a Sauli. Iye akhuwa: ‘Abnere, thangwi yanji nee watsidzikiza mambo wako? Uli kupi mulinga wace wa madzi na dipa yace?’ Sauli adzindikira fala ya Dhavidhi, mbalonga: ‘Iwe mbudandipha, mbwenye nee wacita pyenepi. Ndisadziwa kuti iwe unadzakhala mambo wa Israeli.’ Sauli abwerera kunyumba kwace. Mbwenye nee ndi onsene a banja ya Sauli akuti akhatcinga Dhavidhi.