Daawiti Gooliyaadi shiihu gedensaanni, Moote Saaooli iso olantote roorricha assinosi. Daawiti duucha hige olame qeelino daafira lowo manni afinoha ikki. Isi olame higanno woyite, meentu togo yee faarsanni kubbanno: “Saaooli kume shiino; Daawiti kayinni tonne kume shiino.” Konni daafira, Saaooli hinaase Daawiti shaara hasiˈri.

Daawiti gingilaate dancha gede asse gananno. Mitto barra isi Moote Saaoolira gingilaate gananni heeˈreenna, Saaooli Daawiti shaara qalacco oli. Daawiti miliqita qalacco girgiddaho marte qasidhu. Hakkunni gedensaanni, Saaooli Daawiti shaara duucha hige woˈnaalino. Konni daafira, Daawiti xooqe halalla maaxami.

SSaaooli 3,000 olanto adhe Daawiti shaara haˈri. Saaooli hedeweelcho Daawitinna ledosi noo manni maaxamino godi giddora ei. Daawiti ledo noo manni  ‘Saaooli shaatto barri techooti’ yitusi. Daawiti Saaooli afikkinni yaasanni mare uddanosi qacce mure haaˈri. Hakkiinni, Daawiti Yihowa doorino moote ayirrisinokki daafira, lowo geeshsha gaabbino. Daawiti, ledosi noo manni Saaooli shaannota hoolino. Hakkiinni isi Saaooli woshshe hasiˈroommero shaasira dandaannota kulisi. Saaooli gaabbe Daawiti shaara hasa aguriyya?

Diagurino. Saaooli xaano Daawiti shaara hasino. Mitto hashsha Daawiti rodoosi beetti Abisa ledo Saaooli noowa yaasanni mari. Hakkawoyite, Saaooli agaraanchi Abeneeri goxe bae no. Abisa Daawitira, ‘Saaooli shineemmo barri konneeti! Shee huneemmona agari’ yii. Daawiti Abisara ‘Saaooli assannore Yihowa afinona, urdesinna waa aganno uduunnichosi calla haadheenna haˈno’ yii.

Hakkunni gedensaanni Daawiti ilaalu birxe mare uurre, Saaoolinna ledosi noo manna laˈˈanni togo yii: ‘Abeneeri, Moote Saaooli agara mayira hoogitto? Saaooli urdenna waa aganno uduunnichisi hiikko no?’ Saaooli, Daawiti qaale ikkinota afino daafira togo yiisi: ‘Techo lubboˈya gatisoottoe. Ati xa Israeelete moote ikkattota afoommo.’ Hakkiinni Saaooli minisira higi. Kayinni Saaooli mini manni giddo Daawiti baxannohu no.