Su apang bọu němate si Goliat, Datu Saul němile si Daud nakoạ těmbonangu prajurite. Daud nakauntung su lawọ perang kụ nakoạ terkenal. Sabang i sie mapul᷊ẹ bọu mẹ̌pěrang, manga wawine měněnsomahẹ̌ apidu mẹ̌sal᷊ai dingangu měkẹ̌kantarị, ’I Saul němate hiwune, katewe i Daud pul᷊one hiwu!’ I Saul iri kụ mapulu měmate si Daud.

I Daud jago měnalang harpa. Piạ su sahěllo, su tempong i Daud něnalang harpa gunang i Saul, i Saul něleang si Daud dingangu tombak. I Daud nẹ̌tihọ kụ tombak ene natěbị su darěndung. Bọu ene, Saul pirang sul᷊ẹ mapulu měmate si Daud. Hakị u ene, i Daud timal᷊ang kụ nẹ̌kěmbuni su padang gurun.

Saul nẹ̌bawa 3.000 prajurite gunang mědeạ si Daud. I Saul nasuẹ̌ su liang tampạ i Daud dingangu anạ buane nẹ̌kěmbuni. Anạ buang i Daud simiang, ’Ini kesempatan  si Tuang měmate si Saul.’ I Daud marěma-rěmasẹ̌ nakoạ sarang i Datu Saul kụ němotọ pondol᷊u pakeange. Katewe i Saul tawe nakasilo. Bọu ene i Daud nakapěndang nẹ̌sal᷊a ual᷊ingu tawe něngadatẹ̌ datu seng nipileng i Yehuwa. Daud nẹ̌sěding anạ buane měndariha si Saul. Su tempong i Saul siměbang, Daud nẹ̌kui si Saul kụ nẹ̌bera sěběnarẹ̌e i sie botonge měmate si Saul. Apa i Saul něngědo něnahusu si Daud?

Tala. Saul turusẹ̌ něnahusu si Daud. Piạ su sěhěbị, Daud dingangi Abisyai, keponakan i Daud, marěma-rěmasẹ̌ simuẹ̌ su perkemahan i Saul. Abner, pengawal i Saul mětẹ̌tikị. Abisyai naul᷊ị, ’Tuang, ini tempone! Balạe iạ měmate si sie.’ Daud simimbahẹ̌, ’Ene urusang i Yehuwa. I kitẹ měngal᷊ạe tombak dingangu tampạu inumange, bọu ene mẹ̌bal᷊ị.’

I Daud naawị sarang bul᷊udẹ̌ maraning perkemahan i Saul. I sie němansagẹ̌, ’Abner, kawe i kau tawe něndiagạ datunu? Sua tombak dingangu tampạu inumang i Saul?’ Saul nakakiral᷊a ene tingihi Daud kụ nẹ̌bera, ’I kau sěběnarẹ̌e botonge měmate si siạ, katewe i kau tawe někoạ ene. Iạ masingkạ i kau sarung makoạ datu tuhụe su Israel.’ Bọu ene i Saul napul᷊ẹ sarang istanane. Su kěluargang i Saul, piạ taumata tawe mawěnsing si Daud.