Depois David oho tiha Golias, Liurai Saul hili David atu dirije ninia tropa. David manán funu barak, no nia sai naran-boot. Kuandu David fila husi funu, feto sira sempre dansa no kanta: ‘Saul oho inimigu rihun ida, no David oho inimigu rihun sanulu!’ Saul sai laran-moras ba David no hakarak atu oho nia.

David matenek atu toka arpa. Loron ida kuandu David toka hela arpa ba Liurai Saul, liurai neʼe tuda nia ho diman. David hasees an, no diman neʼe belit iha didin. Depois neʼe, Saul koko beibeik atu oho David. Tan neʼe David tenke halai no subar iha rai-fuik maran.

Saul lori tropa naʼin-3.000 atu bá buka David. Ikusmai Saul tama ba fatuk-kuak neʼebé David no ninia ema sira subar hela. David nia ema sira  bisubisu ba nia: ‘Agora mak tempu diʼak atu oho Saul.’ Entaun David laʼo neineik ba Saul no tesi liurai nia roupa ninin. Saul la hatene kona-ba neʼe. Depois neʼe, David fó sala ba ninia an tanba la hatudu respeitu ba liurai neʼebé Jeová hili. David la husik ninia ema sira atu ataka Saul. Kuandu Saul sai ba liʼur, David bolu Saul no dehan: ‘Se haʼu hakarak, haʼu bele deʼit oho haʼu-nia naʼi liurai!’ Saul para atu duni tuir David ka lae?

Lae. Saul nafatin buka David. Kalan ida David no ninia sobriñu Abisai laʼo ba Saul nia tropa nia tenda. Sira haree katak Saul nia eskoltu Abner dukur hela. Abisai dehan: ‘Agora mak ita-nia oportunidade! Husik haʼu oho Saul.’ Maibé David dehan: ‘Jeová mak sei selu fali ba nia. Mai ita foti deʼit ninia diman no buli, no ita bá.’

Tuirmai David saʼe ba foho neʼebé besik Saul nia tenda. Nia hakilar: ‘Abner, tanbasá mak ó la halo seguransa didiʼak ba ó-nia liurai? Liurai nia diman no buli iha neʼebé?’ Saul rekoñese David nia lian no dehan: ‘Ó bele deʼit oho haʼu, maibé ó la halo nuneʼe. Haʼu hatene katak ó mak sei sai liurai tuirmai ba Izraél.’ Saul fila fali ba palásiu. Tuir loloos, laʼós Saul nia família hotu mak odi David.