Davidi yange wuan Goliati yô, Tor Saulu ver un ér a lu or u hemen ushoja nav. Davidi hemba ityav kpishi, nahan iti na za gwa. Hanma shighe u una za hide ityav yô, kasev ve due ve gba vinen amar shi wan icam kaan ér: ‘Saulu wua ior udubu udubu, Davidi yô, wua udubu pue pue!’ Kwagh ne na yô, Saulu hingir u gban Davidi iyuhe, je lu keren u wuan un.

Davidi yange fa u kuhwan adiguve tsembelee. Nahan iyange igen Davidi lu kuhwan Tor Saulu adiguve, maa tor ker un iwange. Kpa Davidi palegh, iwange shon kar tume ken kpekpe. Saulu shi hide nôngo kwa imôngo ér una wua Davidi. Ken masejime yô, Davidi yevese yem ica, za yer ken toho.

Tsô Saulu mough a ushoja 3,000 gba keren Davidi. Maa Saulu za nyôr ken bar u Davidi yer ker vea ior nav yô, kpa Saulu fa ga. Tsô ior mba Davidi ôr un kwagh ken to ér: ‘Ka ian i u wua Saulu je ne.’ Kpa Davidi za ving ving za tôndo kurugh ku ikyondo i tor  Saulu hua yô. Kpa Saulu fa ga. Davidi eren kwagh ne yô, hide vihi un kpishi er un er kwagh a tor u Yehova a shighe un mkurem la sha icivir ga yô. Nahan a venda a ior nav ér ve de tan num sha Saulu ga. Tsô a hide a yila Saulu genger genger, a kaa a na ér ashen una soo kpa man un wua Saulu. Nahan Saulu de kwagh u wa ishima u eren Davidi la kpa?

Ei. Saulu za hemen u keren Davidi a ku. Kwagen la, Davidi mough vea Abishai tugh, ve za hen ape Saulu vea ushoja nav haa afo yô, kpa Saulu kua ior nav cii fa ga. Abishai lu wan u anmgbian u Davidi u kwase. Abiner, u lu kuran Saulu la je kpa lu yaven. Tsô Abishai ôr a Davidi ér: ‘Ka ian i se wua Saulu je ne! De m wua un.’ Kpa Davidi kaa a na ér: ‘Yehova una tsaha Saulu iyol na. De se tôô iwange na kua isheghmnger na la tseegh, se hide se yem.’

Davidi hide za unde sha uwo ugen her ikyua, uwo la lu sha geng, afo a Saulu vea ushoja nav di lu shin. Maa Davidi ôr kwagh genger genger kaa ér: ‘Abiner, er nan ve ashen u kura tor ga? Isheghmnger i Saulu ngi hana? Man iwange na ye?’ Saulu ungwa ikyenge la lu i Davidi, maa a kaa ér: ‘Mimi je, u dem a de, gayô ashen ma u wuam. M fa je mer me va kar kera yô, we u lu tor u Iserael.’ Saulu maa hide a ushoja nav ve yem ken ya. Kpa lu hanma or hen tsombor u Saulu yange nan kôr Davidi ihyom ga.