Davidi wati wabaya Goliati, Fumu Sauli yingumuŵika kuja mura wa asilikali ŵaki. Davidi wanguphara nkhondu zinandi ndipu wangutchuka ukongwa. Asani Davidi waweku kunkhondu, anthukazi azanga kuzimuviniya ndi kuzimumbiya sumu. Yiwu ambanga kuti: ‘Sauli wabaya ŵanthu masauzandi kweni Davidi wabaya ŵanthu masauzandi nganandi!’ Sauli wangwamba kuchitiya sanji Davidi ndipu wakhumbanga kumubaya.

Davidi wambanga umampha ukongwa zeze. Zuŵa linyaki Davidi wambiyanga Sauli zeze. Sauli wanguponya mkondu kuti wabayi Davidi kweni wanguŵeka nyengu yeniyo ndipu ungulasa pachimati. Pavuli paki, Sauli wanguyesesa kanandi ŵaka kuti wamubayi. Pakumaliya, Davidi wanguthaŵa ndi kuchibisama kuchipululu.

Sauli wanguluta ndi asilikali 3 sawuzandi kuchipenja Davidi. Mwambula kuziŵa, wangusere kuchimphaku ko Davidi  ndi ŵanthu ŵaki angubisama. Ŵanthu wo ŵenga nayu angumutokotose kuti: ‘Uwu ndi mwaŵi waku wakuti ubayi Sauli.’ Davidi wangwenda kamanakamana kuluta ko kwenga Sauli ndipu wangucheketaku chakuvwala chaki. Sauli wanguziŵa cha. Pavuli paki, Davidi wangujimba mulandu kuti wanguyitumbika cha fumu yakusankhika ndi Yehova. Iyu wanguzomereza cha kuti ŵanthu ŵaki ayibayi. Sauli wati watuwaku kuchimphaku, Davidi wangumudaniliza ndipu wangumukambiya kuti, watingi wamubayengi chifukwa wenga ndi mwaŵi wakuchita viyo. Kumbi Sauli wanguleka kukhumba kubaya Davidi?

Awa. Sauli wangulutiriza kupenja Davidi. Zuŵa linyaki ndi usiku, Davidi ndi muphwa waki Abishai angusere mumusasa waku Sauli kwambula weyosi kuziŵa. Chinanga ndi Abnere yo wavikiliyanga Sauli, nayu wangugona. Abishai wanguti: ‘Uwu ndi mwaŵi widu! Agani ndimubayi.’ Davidi wangumuka kuti: ‘Yehova ndiyu wamalanengi ndi Sauli. Tiyi tito ŵaka mkondu ndi kachiŵiya kaki kakumwiya maji, tikengi.’

Davidi wangukwera phiri lo lenga pafupi ndi musasa waku Sauli. Iyu wangudaniriza kuti: ‘Abnere, ntchifukwa wuli unguleka kuvikiriya fumu yaku? Kepani kachiŵiya kaku Sauli kakumwiya maji ndi mkondu waki?’ Sauli wangungaŵanika mazu ngaku Davidi ndipu wanguti: ‘Watingi undibayengi kweni wandibaya cha. Ndiziŵa kuti iwi ndiwi ujengi fumu ya Yisraele pavuli pangu.’ Sauli wanguwere kunyumba yaki yachifumu. Kweni ndi wosi cha a mu banja laku Sauli wo atinkhanga Davidi.