Давид Голиафты тиилеп алган соонда, Саул хаан ону аг-шерииниң баштыңчызы кылдыр томуйлап каан. Давид хөй дайыннарны тиилеп алгаш, дыка билдингир кижи апарган. Дайындан кээрге-ле, херээжен улус: «Саул муң-муң дайзыннарны тиилээн, а Давид — түмен-түмен!» деп самнап, ырлажыр турган. Оон Саул Давидти адааргап эгелээш, өлүрер деп бодап алган.

Давид арфага дыка чараш ойнаар турган. Бир катап Давид Саулга ойнап берип олурда, оозу чыданы олче октапкан. Давид былдаптарга, чыда ханага кадалы берген. Ооң соонда Саул ону каш-даа катап өлүрерин кыскан. Соонда Давид дезе бергеш, ээн кургаг ховуга чаштына берген.

Саул Давидти дилээр дээш, 3000 дайынчызын чыып алгаш чорупкан. Бир катап ол Давид биле ооң улузунуң чаштып чыткан куюнга келген. Давидтиң улузу:  «Ам Саулду өлүрер аргаң бо-дур» — деп сымыранган. Давид Саулдуң чанынга оожум үңгеп чеде бергеш, хевиниң эдээнден кезип алган. Саул чүү-даа эскербээн. Оон Давид Иегованың томуйлап каан хаанынга ындыг хүндүткел чок болганы дээш аажок муңгарап турган. Ынчангаш Давид улузунга Саулче халдаарын чөпшээревээн. Куйдан үнүп келгеш, ол безин Саулга: «Көрүп тур сен бе, мээң аргам турда-ла, сени өлүрбедим!» — деп алгырган. Саул Давидке хамаарылгазын өскертип алган бе?

Чок. Саул Давидти улаштыр истеп сүрүп турган. Бир дүне Давид биле ооң чээни Авесса Саулдуң турлаанче бүдүү чеде берген. Олар шупту, Саулдуң камгалакчызы Авенир безин, удуп чыткан. Авесса Давидке мынча дээн: «Ам-на арга бо-дур! Саулду өлүрүп кааптайн». Ынчалза-даа Давид: «Иегова Саулду боду кезедир. Чүгле ооң чыдазы биле суглуг савазын ап аалы» — дээн.

Давид Саулдуң турлаа көстүп турар дагже үне бергеш, алгырган: «Авенир! Чүге хааныңны багай камгалап тур сен? Саулдуң чыдазы биле суглуг савазы кайыл?» Саул Давидтиң үнүн танып кааш, мынча дээн: «Сен мени өлүрүп болур хиреңде, ону кылбаадың. Дараазында Израильдиң хааны сени болур деп билир мен». Саул ордузунче чана берген. Ынчалза-даа Саулдуң өг-бүлезинге Давидке ынак кижи база турган.