Katapos patayon ni David hi Goliat, ginhimo hiya ni Hadi Saul nga lider han iya mga sundalo. Nagdaog hi David ha damu nga girra, salit nagin kilala gud hiya. Pag-uuli niya tikang ha girra, an kababayin-an natapo nga nagsasarayaw ngan nagkakaranta: ‘Hi Saul nagpatay hin yinukot, ngan hi David nagpatay hin tinagnapuplo ka yukot!’ Hi Saul naawa kan David ngan gin-ikaparatay niya hi David.

Hi David maopay magtokar hin arpa. Usa ka adlaw, han gintutokaran niya hi Saul, ginbangkaw hiya ni Saul. Pero nakaiskip hiya, salit an bungbong an naigo. Katapos hito, damu ka beses pa nga gin-ikaparatay hiya ni Saul. Ha urhi, nagpahirayo hiya ngan tinago ha disyerto.

Nag-upod hi Saul hin 3,000 nga sundalo basi pamilngon hi David. Nahituman nga nakasulod hiya ha lungib nga gintatagoan  mismo ni David ngan han iya mga sundalo. Ginhuringan hi David han iya mga sundalo: ‘Higayon mo na ini nga mapatay hi Saul.’ Hinay-hinay nga kumadto hi David kan Saul ngan gintabasan an bado han hadi. Waray hito umabat hi Saul. Katapos, nakonsensya gud hi David nga waray niya respetoha an hadi nga gindihogan ni Jehova. Waray niya tuguti an iya mga sundalo nga patayon hi Saul. Ginsidngan pa ngani niya hi Saul nga puydi unta niya patayon hi Saul han nagkaada hiya higayon. Nagbag-o ba an hunahuna ni Saul mahitungod kan David?

Waray. Gin-ikaparatay la gihap ni Saul hi David. Usa ka gab-i, hi David ngan an iya umangkon nga hi Abisay hinay-hinay nga kumadto ha kampo ni Saul. Nakaturog an ngatanan pati an gwardya ni Saul nga hi Abner. Hi Abisay nagsiring: ‘Higayon ta na ini! Tuguti ako nga patayon hiya.’ Hi David binaton: ‘Hi Jehova an bahala kan Saul. Kuhaon ta na la an iya bangkaw ngan surudlan hin tubig ngan lakat na kita.’

Sinagka hi David ha kahirani nga bukid diin nakikita an kampo ni Saul. Nagsinggit hiya: ‘Abner, kay ano nga waray mo bantayi an imo hadi? Hain an kan Saul surudlan hin tubig ngan bangkaw?’ Nakilal-an ni Saul an tingog ni David ngan siniring: ‘May higayon ka na unta nga mapatay ako, pero waray mo ito buhata. Maaram ako nga ikaw an sunod nga magigin hadi han Israel.’ Binalik hi Saul ha iya palasyo. Pero diri ngatanan nga kapamilya ni Saul nasisina kan David.