Davida koa fa baka namono Goliata, izy nataony Saoly sefony maramilanany. Nandresy fo Davida koa fa niady, ke nanjary tianolo mare. Isaka izy baka niady, nisy man̈angy maro nitsena izy nitsinjaka sady nihira: ‘Saoly nahafaty arivoarivo, fa Davida nahafaty nandilatra folo arivo!’ Saoly nanjary tsy tia Davida, ke nitady hamono izy.

Nahay nitendry harpa Davida. Tandraraiky, Davida mbala mitendry harpa hamparavoravo Saoly in̈y, nivangoeny Saoly toraka saboa izy fa Davida niafaka, ke raha io tsy navoa izy fa navoa riba. Tihamono Davida fo Saoly, ndray tafaranizen̈y. Farany Davida nilefa tamy tany paiky tan̈y foeky nisitriky Saoly.

Nitondra maramila 3 000 Saoly nandeha nan̈ian̈a Davida. Tandraraiky Saoly efa tan̈aty lavabato nisitrihany Davida ndreky namany aby io. Namany  Davida nibisibisiky taminany: ‘Okazionao ziô e. Vonia izy!’ Nijokojoko nan̈aton̈o Saoly Davida, ke nitapahiny tendrony lambanany, fa tsy ren̈iny Saoly foeky. Davida baka tio nanen̈iny mare, fotony izy tsy nan̈aja olo voahosotro Jehovah. Tsy nambelany Davida hamono Saoly foeky iro namany aby io. Izy nandronton̈o nivolan̈a tamy Saoly fa efa tsaiky natiny izy, fa Davida fo tsy tihamono izy. Ke nanjary tiany Saoly ma Davida tafaranizen̈y?

Mbala nitady hamono Davida fo Saoly. Alin̈y araiky zay, Davida ndreky Abisay zanakanabaviny nijokojoko niditry tamy tobiny Saoly. Nandry mare Saoly ndreky maramilanany taminio. Tafandry mare koa Abnera piambin̈y Saoly. Ho Abisay: ‘Ambilà zaho hamono Saoly.’ Ho Davida: ‘Aha! Ambilà fo Jehovah han̈asazy izy. Saboanany ndreky raha fasiany rano fo aleva, fa atsika handeha.’

Nanonga tamy bongo narikitry tio Davida, nandronton̈o iro tamy tobiny Saoly: ‘Abnera, nan̈ino anao tsy niambin̈y panjakanao? Aia raha fasiany rano ndreky saboanany?’ Hainy Saoly feony Davida, ke hoizy: ‘Zaho koa nivonenao, efa naty. Haiko fa anao ho panjakany Israely.’ Nody Saoly. Ndray zen̈y, tsy havany Saoly jiaby tsy tia Davida.