Daudi ali awuleje Goliyati, Mwenye Sauli ŵam’ŵisile jwalakwe kuŵa jwamkulungwa jwa asilikali ŵakwe. Daudi jwapundile ngondo syejinji. Yeleyi yatendekasisye kuti aŵe jwakumanyika mnope. Ndaŵi syejinji Daudi paŵawujaga ku ngondo, acakongwe ŵaŵinaga kwineku ali mkwimba kuti, ‘Sauli awuleje masawusande, nambo Daudi awuleje masawusande gejinji!’ Sauli ŵatandite kumtendela jelasi Daudi mwamti ŵasakaga kum’wulaga.

Daudi jwakombolaga kwimba cenene gitala. Lisiku line Daudi ali kumjimbila gitala mwenye Sauli, mwenyejo jwaponyisye lipanga kuti am’wulaje Daudi. Nambo Daudi ŵagwasile lipangalyo, ni lyasomile pepupa. Kutyocela pelepa, Sauli jwalingaga matala gakulekanganalekangana gakum’wulajila Daudi. Nambo jwalakwe jwatisile ni kuja kuŵa m’cipululu.

Sauli yalumo ni asilikali ŵakwana 3,000, ŵatandite kumsosasosa Daudi. Kaneko ŵakopocele kumbanga jaŵajuŵile Daudi  yalumo ni acalume ŵakwe. Acalume ŵaŵaliji ni Daudi ŵala, ŵatandite kusongona kuti, ‘Awu uli upile wawo kuti am’wulaje Sauli.’ Daudi jwajesile mwangatenda masegwe ni kuja kata kambali ka cakuwala capenani ca mwenye. Pandaŵijo Sauli nganamanyililaga cilicose. Panyuma pakwe Daudi jwalipikene kuti nganatenda cenene ligongo nganacimbicisya mwenye jwamsagulwe ni Yehofa. Jwalakwe nganiŵakunda acalume ŵaŵaliji nawo ŵala kuti am’wulaje Sauli. Jwayikene pakumsalila Sauli kuti akasace akam’wuleje. Ana Sauli ŵacenjile nganisyo syakulemwecekwa syaŵakwete kwa Daudi?

Iyayi. Sauli ŵajendelecele kumsosasosa Daudi. Lisiku line cilo, Daudi yalumo ni cipwa cakwe Abisayi ŵapite kumalo gaŵatamaga Sauli ni asilikali ŵakwe. Pandaŵiji wosope kupwatikapo Abineli juŵaliji jwakumlolela Sauli ŵaliji ali agonile. Abisayi jwatite, ‘Awu uli upile wetu! Angunde nam’wulaje Sauli.’ Daudi ŵajanjile kuti, ‘Yehofa ni jucacimalana najo Sauli. Kwende tugambe kujigala lipanga soni mgawo wakwe wa mesi ni tujawuleje.’

Kaneko Daudi ŵakwesile litumbi lyalyaliji ciŵandika ni malo gaŵatamaga Sauli ni asilikali ŵakwe. Jwalakwe ŵagumisile kuti, ‘Abineli, ligongo cici mlepele kumcenjela mwenye jwenu? Ana lipanga soni mgawo wa Sauli yili kwapi?’ Sauli jwapikene maloŵe ga Daudi ni jwatite, ‘Mkakombwele kumbulaga, nambo nganimtenda yeleyo. Ngumanyilila kuti cimciŵa mwenye jwakuyicisya jwa Ayisalayeli.’ Sauli jwawujile kunyumba jakwe ja ucimwene. Nambo ngaŵa kuti ŵandu wosope ŵa m’liŵasa lya Sauli ŵam’ŵengaga Daudi.