Ka tsʼoʼok u kíimsaʼal Goliat tumen Davideʼ, rey Sauleʼ tu tsʼáaj David u beet u nojchil u soldadoʼob. Letiʼeʼ yaʼab baʼateloʼob tu ganartaj yéetel jach kʼaj óoltaʼabi. Cada ken suunak ken tsʼoʼokok le baʼateloʼ, ku jóokʼol chʼaʼabil u beel tumen le koʼoleloʼoboʼ, letiʼobeʼ táan u kʼaayoʼob yéetel táan u yóokʼotoʼob. Ku yaʼalikoʼob kaʼachi: ‹Sauleʼ tsʼoʼok u kíimsik u milesil u enemigoʼob, yéetel Davideʼ u decenasil u milesil u enemigoʼob›. Yoʼolal lelaʼ, Sauleʼ káaj u sen pʼektik David yéetel taak kaʼach u kíimsik.

Davideʼ jach u yojel u paax arpa. Juntéenjeakeʼ le táan u paax u yuʼub Sauloʼ, le reyoʼ tu chʼinaj yéetel u lanza. Chéen baʼaleʼ Davideʼ tu jechaj, le lanza túunoʼ chʼíik teʼ pakʼoʼ. Ka tsʼoʼok lelaʼ, Sauleʼ yaʼab u téenel tu yóotaj u kíimse. Le oʼolal Davideʼ púutsʼi, bin u taʼakuba teʼ desiertooʼ.

Saúl túuneʼ bin yéetel 3,000 soldadoʼob u chʼaʼpacht David. Chéen baʼaleʼ ook teʼ sajkab tuʼux u taʼakmuba David yéetel u soldadoʼoboʼ.  Letiʼobeʼ tu x-mukul aʼaloʼob tiʼ David: ‹U súutukil utiaʼal a kíimsik Saúl›. Davideʼ náatsʼ chaambelil yiknal Saúl ka tu xotʼaj u xéetʼ u nookʼ sin ke u tsʼáaik cuenta. Ka tsʼoʼokeʼ, Davideʼ maʼ tu yuʼububa maʼalobiʼ tumen maʼ tu respetartaj le rey yéeyaʼan tumen Jéeobaoʼ. Le oʼolal maʼ tu chaʼaj u beetaʼal mix baʼal tiʼ Sauliʼ. Le ka jóokʼ Saúl teʼ sajkaboʼ, Davideʼ tu kʼaʼam aʼalajtiʼ: ‹Tsʼoʼok kaʼach in kíimskecheʼ, pero maʼ tin beetiʼ›. A tuklikeʼ, ¿tratartaʼab wa maʼalob David tumen Saúl?

Maʼatech. Sauleʼ seguernaj u chʼaʼpachtik. Junpʼéel áakʼabeʼ David yéetel Abisai, u sobrinoeʼ, ookoʼob teʼ tuʼux jelekbal Saúl yéetel u soldadoʼoboʼ, mix máak iloʼob. Tak Abner, le máax kanáantik Sauloʼ, táan u wenel kaʼachi. Abisaieʼ tu yaʼalaj: ‹¡Beoraaʼ tsʼoʼok u lúubul t-kʼab! Chaʼa in kíimsik›. Chéen baʼaleʼ aʼalaʼabtiʼ tumen David: ‹Pʼat tu kʼab Jéeoba. Chʼaʼ u lanza yéetel u nuʼukul u yoʼoch jaʼeʼ ka xiʼikoʼon›.

Ka tsʼoʼokeʼ Davideʼ naʼak tiʼ junpʼéel puʼuk yaan naatsʼ teʼeloʼ. Desde tu kaʼanlileʼ tu yilaj le tuʼux jelekbal Saúl yéetel u soldadoʼoboʼ. Davideʼ tu yawtaj: ‹¡Abner, ¿baʼaxten maʼ ta kanáantaj a reyiʼ?! ¿Tuʼux yaan u lanza yéetel u nuʼukul u yoʼoch jaʼ?›. Sauleʼ tu tsʼáaj cuenta David le tʼaanajoʼ, ka túun tu yaʼalajtiʼ: ‹Lúuben kaʼach ta kʼab, pero maʼ ta kíimseniʼ. Tsʼoʼok in tsʼáaik cuentaeʼ teech ken a beet u reyil Israel›. Ka tsʼoʼokeʼ Sauleʼ suunaj tu palacio. Chéen baʼaleʼ maʼ tuláakal u láakʼtsiloʼob le rey u pʼekmoʼob kaʼach Davidoʼ.