Biiti si David Goliat, gulí rey Saúl laabe para gácabe jefe stiʼ ejércitu stiʼ. Biʼniʼ ganar David stale guerra ne nabé binibiáʼ binni laa. Cada biaje guibiguetaʼ David de lu guerra, ridxaagalú caadxi gunaa laabe, maʼ cuyaacaʼ ne maʼ cayuundacaʼ sicaríʼ: «Saúl maʼ biiti stale mil de ca enemigu stiʼ, peru David maʼ biiti jma de chii mil». Ngue runi, bizulú gupa Saúl envidia David ne gucalaʼdxiʼ ñuuti laabe.

Guizáʼ galán bixhidxi David arpa. Ti dxi, laga cuxhídxibe para Saúl, bindaa rey riʼ ti lanza laabe. Peru nagueendaca gundeteʼ íquebe, ngue runi guriá yoo gucuá lanza que. Despué de ngue, gucaláʼdxiruʼ Saúl ñuuti laabe stale biaje. Últimu la? bixooñeʼ David ne bicaachilú lu desiertu.

Yenanda Saúl laabe ne chonna mil soldadu. Ni málasi yechuu Saúl ndaaniʼ cueva ra nucaachilú David ne ca xpinni. Gudxi ca hombre que David: «Yannadxí  biaba Saúl lu naluʼ, biiti laabe». Bidxiña David ra nexheʼ Saúl ne bigá ti ndaa xhábabe sin nudiibe cuenta. Peru despué guyuu David triste purtiʼ qué ñuni respetar rey gulí Jiobá, ngue runi qué nudiibe lugar ñuuti ca xpínnibe Saúl. Ora biree Saúl de ndaaniʼ cueva que, bicaa David ti ridxi ná: «Ñanda ñuuteʼ lii, peru qué ñunediáʼ ni». ¿Ñee rábiluʼ maʼ zusaana de zananda Saúl laabe la?

Coʼ. Guzanándaruʼ Saúl laabe. Ti gueelaʼ, laga nisiaasiʼ Saúl ne ca soldadu stiʼ, yechuu David ne sobrínube Abisái ra campamentu stiʼ Saúl. Dede Abner, hombre ni rapa rey Saúl nisiaasiʼ. Gudxi Abisái David: «¡Yanna huaxa! Bidii lugar naa guuteʼ Saúl». Peru bicabi David laabe: «Xcuenta Jiobá laabe. Mejor gucuaa lanza ne jarru nisa stibe, ne chuu de raríʼ».

Despué, gudxiʼbaʼ David lu ti dani nuu gaxha de raqué. De lu dani que biiyabe campamentu stiʼ Saúl. De raqué, bicaabe ti ridxi: «¡Abner! ¿Xiñee qué ñápaluʼ rey stiluʼ pue? ¿Paraa nuu jarru ne lanza stibe?». Binibiáʼ Saúl ridxi stiʼ David ne guníʼ: «Ñanda ñuutiluʼ naa, peru qué ñúniluʼ ni. Yanna huaxa maʼ nannaʼ zácaluʼ rey stiʼ Israel». Despué bibiguetaʼ Saúl ra palaciu stiʼ. Peru cadi guiráʼ familia stiʼ Saúl nga gucananalaʼdxiʼ David.